Iphoyisa likaMasipala weTheku lisolwa ngokugwaza libulale uzakwabo wesifazane esigamekweni okuthiwa senzeke enkabeni yeTheku ezintatha ngeSonto.
Okhulumela amaphoyisa kaMasipala weTheku, uColonel Boysie Zungu, usiqinisekisile isigameko.
Unqabile ukudalula eminye imininingwane ngalolu daba wathi selusingethwe amaphoyisa akwaSAPS.
Ngokuthola kweSolezwe, la maphoyisa ebengekho emsebenzini ngesikhathi sesigameko.
Kuthiwa umsolwa ugcine ezinikela emaphoyiseni waboshwa.
Okhulumela iSAPS KwaZulu-Natal, uColonel Robert Netshiunda ukhiphe isitatimende lapho ethe owesilisa oneminyaka engu-27 uboshwe ngemuva kokugwaza intombi yakhe eflethini.
Kuthiwa lezi zithandani beziphuza utshwala ngesikhathi owesilisa egwaza owesifazane. Kuthiwa uphinde waqopha ama-video nezithombe owesifazane esefa wazithumela abantu abahlukene waphinde wafakaa nasezinnkundleni zokuxhumana.
Uthe imbangela yesigameko ayikaziwa.
*Sekwengezwe ukuphawula kukaColonel Robert Netshiunda odabeni obekungekho phambilini.