KUBIKWA ukuthi itekisi ebizama ukuwela ebhulohweni lomfula iNcamndane igugulwe amanzi yatholakala isiginqikile. Lokhu kwenzeke ku-ward 1 kuMasipala waseMadlangeni, ngaphansi kwesifunda saseMajuba.
Abagibeli abathathu bakwazile ukuphuma bawelela endaweni ephephile; Nokho, owesifazane oneminyaka engu-33 ubudala akakwazanga wagcina eseminza.
Umnyango wezokuBusa ngokuBambisana neziNdaba zoMdabu uthi ithimba labatakuli lithunyelwe ngokushesha endaweni yesigameko. Imizamo yokuthola isidumbu ayiphumelelanga. Umphathiswa uMfundisi Thulasizwe Buthelezi udlulise ukuzwelana kwakhe nomndeni oshonelwe futhi usejube amathimba abhekelele izinhlekelele ukuthi alethe usizo oludingekayo kulesi sikhathi esinzima. Iyaqhubeka imizamo yokusesha isidumbu sikamufi.
UButhelezi usenxuse izakhamizi ukuthi ziqaphele njengoba isimo sezulu esingesihle sibeka engcupheni impilo yabantu. Lesi sifundazwe sibe nemvula enamandla ngokwesigaba 4 no-5 ngoLwesibili nangoLwesithathu.
