KULINDELEKE izinkumbi zamabutho emcimbini wokubungazwa kweNkosi yaseNadi, eMgungundlovu, uVusizwe Zondi, eSibukosezwe, eMathulini, eBhamshela ngeSonto kusukela ngo-11 ekuseni. Kule ndumezulu kuzobe kunandisa omaskandi abaningi okubalwa kubo uMdumazi, Amavikelambuso, Gadla Nxumalo, Dumakude, Majongosi, Manyuswa, Sgwili, Dumakude, Ndabenhle, Overload, Challenge, Phumlani Gumede, Mhlanganisi, TCG, Inkosi Yamageza, Muhle Mkhize neNkosana. Uhlelo luzobe luphethwe wuMC Mgijima noMC Melisizwe.
INkosi uZondi ithe izobe ikhishwa ngosiko koninalume njengoba ingumzukulu weNkosi uZwelinjani Mthuli. UNondaba uthe ukhulele khona eMathulini njengoba ayebhace khona engakangeni esihlalweni sobukhosi baseNadi, eMgungundlovu.
Kulo mcimbi kulindeleke izicukuthwane eziningi okubalwa kuzo
iMeya yaseMgungundlovu, uMnuz Mzi Zuma, iphini leMeya yaseMgungundlovu, uNkk Sbo Dlamini-Madlala, Imeya yaseMsunduzi, uMnuz Mzi Thebolla nephini lakhe uMnuz Mxolisi Mkhize, owayenguNgqongqoshe wezeMpilo, uMnuz Zweli Mkhize noNgqongqoshe wezoLimo eKZN, uMnuz oSuper Zuma.
"Engingakusho ukuthi isintu, ikakhulukazi ebukhosini siyaziwa. Ngakho-ke ukufezekisa lomcimbi kuzokwenza ukuthi ngibe namandla nokukhalipha ekubuseni kahle esizweni sobabamkhulu ngokuthula nokuvikeleka ezitheni," kuphetha iNkosi uZondi. Isolezwe lihabule ukuthi kuzobe kubulewe izinkomo ezinhlanu.