UPHELELWE ngamandla wachiphiza izinyembezi uSphamandla Dhlomo (27) ngesikhathi iNkantolo eNkulu yaseThekwini izolo imgweba odilikajele abangu-7 neminyaka engu-15 nengu-10, yeleka nengu-5 ngaphezulu ngamacala okubulala eMlaza.
UDhlomo ulahlwe amacala ngenxa yesehlakalo sokubulawa kwabangu angu-9 esenzeka ngo-Agasti 11, 2023, kwaQ eMlaza. Ubekade ethwesewe uMbuso amacala awu-13; kuwona okukhona ukubulala abantu abayisishiyagalolunye, amabili okuzama ukubulala, elokugqekeza nelokutholakala nesibhamu esingekho emthethweni.
Utheswe amacala okubulala okuhleliwe oMlungisi Zuma, Phakamani Sibusiso Dlamini, Maxwell Sibisi, Regional Bongimpilo Ngema, Thabani Ngcobo, Mhlengi Khathi, Ayabongwa Mbayise, Sifundo Sibusiso Dlamini noSifiso Cele.
IJaji u-Esther Johanna Steyn lithe limgweba odilikajele abangu-7 ngesenzo sakhe esithe saba nonya olukhulu sokubulala. Lamnikeza eminye engu-15 ngelokufa kodwa elithe kwakungahleliwe. Lamgixabeze ngeminyaka angu-10 ngecala lokuzama ukusoconga uMnuz Phiwayinkosi Sibisi nentombi yakhe uNksz Mbali Shangase.
Lileke ngeminyaka engu-5 ngaphezulu ngecala lokugqekeza ezindlini zabafi. Ngemuva kwalesi sigwebo uDhlomo ubonakale eciphiza izinyembezi.
Ijaji alizange liyithi nje vu eyokuthi lezi zigwebo uDhlomo uzozidonda zonke kanye kanye. Kwale noma ummeli wakhe u-Advocate Mathomane emncengela ethi ungumfanyana nje osemncane owalingwa yingcidezi yabangani wagcina esephila impilo engalungile emphakathini.
Uqhubekile ummeli wakhe wathi inkantolo ingambulali kakhulu ngesigwebo ngoba inhloso yesigwebo ukuhlumelelisa isimilo kuloyo ongumoni. Uthe uDhlomo unengane anayo futhi ukukhula ngaphandle kukayise kungumnyombo wempilo agcine esezithola esengena ogibeni lwayo.
"Ngiyacela nkosi yenkantolo ukuba konke lokhu ukubukisise kahle,'' kusho ummeli wakhe u-Advocate Mathomana. Noma kunjalo ijaji lithe baningi abantu abakhula ngaphandle kwabazali kodwa abaphili ngokuchitha igazi labanye. Liqhubekile lezwakalisa ukuthi uDhlomo ubonakala ewumuntu ongenalo nhlobo nje uzwelo futhi ongakaze akhombise nje ukuzisola ngakwenza.
"Awukaze ukhombise ukuzisola futhi awukaze uzame nokuxolisa ebantwini abaningi owabazwisa ubuhlungu ngowakwenza kubona. Ungumuntu ongakukhathalele ukuthi abanye abantu baphatheke kabi kangakanani,'' lisho kanjena limbuka emehlweni uDhlomo.
Likhale ngezibazi elithe zishiywe uDhlomo kumalungu emindeni yabafi. Lithe isigwebo salo sibheke kakhulu uhlobo lwecala olwenziwe uDhlomo, uzinzo emphakathini kanye nokungenzeka uma kungathiwa bayanda emphakathini abantu abenza izenzo ezifana nezikaDhlomo.
UDhlomo ugwetshwa nje loyo owayengummangalelwa wesibili kuleli cala, uMnuz Zimisele Ngcongo, kuvele ukuthi wendela koyisemkhulu ngoJanuwari ngonyaka owedlule.
Ngaphambi kokuba kuwe isigwebo umshushisi obemele uMbuso u-Advocate Macdonald ushayele isipikili sokugcina enxenxa inkantolo ukuba imgixabeze ngesigwebo esinesisindo uDhlomo. Okuqaphelekile ukuthi nayizolo enkantolo beziqinile kakhulu ezokuphepha. Bekugcwele amaphoyisa abefake umfaniswano nabengawufakile.
Owesilisa obephethe isikhwama esikhulu egaxe isibhamu esikhulu owabonakala ngosuku lwesinqumo ubekhona futhi nayizolo.
Umthombo wangaphakathi ngosuku okwakuphuma ngalo isinqumo wapotshozela Isolezwe ukuthi lokhu kumayelana nejaji elizwakalise ukuthi lizizwa lingaphephile kuleli cala.
Kunabesilisa ebebezokweseka uDhlomo abezwakale bekhuluma naye bethi makakhululeke bazogoduka naye. Lokhu kakucaci ukuthi bebezokenza kanjani futhi nini.
Izolo ijaji limbize ngegama owesilisa waseMlaza ohweba ngezidakamizwa osebenzisana noDhlomo lithe igama lakhe uFani Fani.
Ngaphambilini kwake kwaphazamiseka ukuqulwa kwaleli cala ngesikathi uDhlomo ehlaselwa ukugula okungaqondakali waze waphuthunyiswa esibhedlela esingaphakathi ejele eWestville.
Kuzokhumbuleka ukuthi uDhlomo ngaphambilini wawaphika wonke amacala, wathi kusezandleni zoMbuso ukuthi ulethe ubufakazi obuphathekayo bokuthi uyena owakwenza.
Ezinkundleni zokuxhumana uDhlomo ubaziwa ngelikaThayelakunomoya-umshikashika. Esegwetshiwe ukhulume nabesilisa ebebezomeseka ebakineza uplastiki omnyama bazama ukukhuluma naye kwabonakala ukuthi akathandi ukukhuluma nabo.
Eseqedile ukukhuluma nalaba besilisa amaphoyisa amqhubile ashona naye phansi kwaphela kanjalo ngoThayelakunomoya-umshikashika.