KUBE nenhlokomo kwaduma nehlombe, kwashaywa isiqubulo esithi abahambe abahambayo izolo ePhalamende kuphasiswa isabelomali esinyusa intela efakwa uma kuthengwa impahla, iVAT ebesichithwa yi-DA namanye amaqembu.
Lokhu kwenze sashuba isimo kwi-DA njengoba ikhula ingcindezi yokuthi kuhlukane izindlela kuhulumeni wokubambisana kwamaqembu kuleli owaziwa nge-GNUemva kokuba i-DA ichithe eyokuphasisa isabelomali.
Angu-194 amalungu ePhalamende avotele ukuphasisa isabelomali kwathi angu-182 asichitha.
Leli qembu liyalelwe ukuthi likhethe phakathi kokuba yiqembu eliphikisayo, noma liqhubeke nokuba yingxenye kahulumeni.
Enkulumeni eputshukile kaMengameli Cyril Ramaphosa, kuzwakale ethi utshele umholi we-DA uMnuz John Steenhuisen, onguNgqongqoshe wezoLimo kwiKhabhinethi, ukuthi sekulele kubona ngabazokwenza mayelana nokuvotela isabelomali.
Kule nkulumo uRamaphosa uzwakala ethi i-DA ayikwazi ukuba kuhulumeni iphinde ibe yiqembu eliphikisayo, ngakho kumele ikhethe okukodwa.
Izolo kuvele imibiko yokuthi isigungu esiphezulu se-DA sizohlangana, sinqume ngekusasa laleli qembu kwi-GNU.
Ngesikhathi amaqembu ahlukene ekhuluma ngesikhathi kunenkulumo mpikiswano ePhalamende izolo ngokuphasisa noma ukuchitha isabelomali esethulwa nguNgqongqoshe wezeziMali uMnuz Enoch Godongwana, okhulumela i-DA kwezezimali, uDkt Mark Burke, uthe baba yingxenye ye-GNU ngoba befuna ukukhulisa umnotho nokwakha amathuba emisebenzi.
Uthe uma bephoqwa ukuthi baphume kwi-GNU ngenxa yezinto abakhokhelwa kuzona, bazokwenza lokho.
"Siyasichitha lesi sabelomali. Siyohlangana empini," usho kanje.
Nelungu le-EFF uNksz Omphile Maotwe, lithe bayasichitha isabelomali ngoba sinyusa iVAT ngo-0.5%. I-VAT imi ku-15%, kanti izonyuka kusuka ngoMeyi 1.
"Uma siphasiswa lesi sabelomali sizohlangana enkantolo. Asihambisani nesabelo esinyusa iVAT ezoshaya abahlwempu."
UMnuz Brian Molefe we-MK, uthe uma i-DA izwa kushisa kwi-GNU, kumele iphume.
"I-DA sengathi isalobizela ukuba yiqembu eliphikisayo kuleli. Ayikwazi ukuthi ingaba kuhulumeni, iphinde ibe yiqembu eliphikisayo. Uma kushisa kwi-GNU, ayiphume i-DA."
Umholi wePatriotic Alliance uMnuz Gayton McKenzie, uthe ubelokhu enxenxa abamaqembu ahlukene ukuthi i-DA kumele ingaphumi kwi-GNU.
"Kodwa manje sengishintshe umbono wami ngendaba ye-DA kwi-GNU. Abahambe," kusho uMcKenzie.
UGodongwana ovale inkulumo mpikiswano, uthe ukunyusa iVAT kuzongenisa u-R13.5 billion emnothweni.
Uthe kumele kushintshe ukwenza ohlelweni lwesabelomali ukuze uwonke wonke abe nombono ngokuthi ikuphi okumele bakuxhase nokungamele bakuxhase.
Mayelana ne-DA uthe akacabangi ukuthi ingafuna ukuchitha isabelomali bese ifuna ukuba yingxenye kahulumeni.
"Kumele sidwebe ulayini ngoba ngeke uchithe isabelomali, bese ngakusasa ufuna ukuba yingxenye kahulumeni ozophusha leso sabelomali," kusho uGodongwana.
Sekuvotelwa isabelomali, uSotswebhu we-MK uMnuz Mzwanele Manyi, uthe bafuna kuvotwe.
Amanye amaqembu aseka isabelomali kubalwa i-IFP, UDM, Al Jamah, PA, PAC, Bosa, Rise kanti asichithayo yi-MK, EFF, DA, FF Plus, ATM, ACDP.