KUTHIWA isikhiphe izidumbu impi eshisa phansi phakathi kwamalungu eqembu lemigulukudu, iWest, eNanda, njengoba kuvela ukuthi abanga isikhundla sobengumholi osanda kubulawa.
UMnqobi "Namba 10" Nzimande (22) waseMzomusha, eNanda, wadutshulwa amaphoyisa ekupheleni kukaJanuwari, etholana phezulu namaphoyisa eCottonlands, eVerulam.
Kuthiwa wayengumholi waleli qembu lemigulukudu, ovutha ekhaleni.
Ngokubika kwamalungu omphakathi asezindaweni ezehlukene eNanda, KwaMashu naseNtuzuma, leli qembu beliwuhlalise lubhojozi umphakathi ngobugebengu.
Kuthiwa amalungu alo abamba inkunzi esebenzisa indlakadla, edlwengula futhi engakunqeni ukuchitha igazi.
Ngokusho kwamaphoyisa ngesikhathi ethela othulini uMnqobi, kwase kuphele eside isikhathi emfundela amacala angaphezu kuka-20, athi kuwona kukhona angu-10 okubulala.
Ngokuthola kweSolezwe ngomthombo walo oseNanda, emva komngcwabo wakhe, kuqale umbango wokuthi ngubani ozothatha izintambo zokuhola iqembu.
“Lo mbango uqale ukuthatha elinye igxathu emasontweni ambalwa edlule, sesizwa kuthiwa sebeyadubulana, babulalane, bebanga isikhundla,” kusho umthombo.
Uthe esigamekweni sakamumva esenzeke eNhlungwane, ngoLwesine, kudubulane ababili, bafa.
Umsunguli weNtuzuma Neighbourhood Watch, esabalale nakwamanye amalokishi eThekwini, uMnuz Andile Jali ukuqinisekisile lokhu.
Uthe bezwe ngokwenzekilebesemhlanganweni wokulwa nobugebengu esiteshini samaphoyisa eNanda.
“Sitshelwe ukuthi amaphoyisa aphuthuma endaweni yesigameko ngoba sekubulalane amalungu eWest,” kusho uJali.
Uthe akukho okunye abakutholayo ngalezi zigameko ngaphandle kokuthi babanga ukuphatha njengoba kwashona umholi wabo.
“Manje kuthiwa baningi abazibona befanelwe ukuthatha isikhundla,” kusho uJali.
Uthe okunye abakutholile ukuthi lo mbango usuholele ekutheni bathi chithi saka ezindaweni ezehlukene, njengoba sekukhona ukungazwani kahle kubangwa isikhundla.
Ukuqinisekisile ukuthi bazwile ukuthi zikhona ezinye izigameko zokubulalana ezandulela esangoLwesine.
Okhulumela amaphoyisa KwaZulu-Natal uConstable Thenjiswa Ngcobo uthe amaphoyisa asesiteshini saseNanda aphenya amacala okubulala kulandela ukudutshulwa, kubulawe amadoda amabili eNhlungwane ngoLwesine.