IKUSASA leRoyal AM esigabeni esikhulu sebhola laseNingizimu Afrika selilele ezandleni zabaphathi bamaqembu angu-15 okubunjwe ngawo iBetway Premiership.
Lokhu kulandela isiphakamiso sokunqamula ubulungu be-AM kwiligi okuvela ukuthi sithathwe yisigungu sePremier Soccer League (PSL), i-Executive Committee (Exco), emhlanganweni obungoLwesithathu eGoli.
Ngokuhosha kweSolezwe, lo mhlangano ubuholwa ngusihlalo wePSL, u-Irvin Khoza noMato Madlala obambe esikhundleni sokuba yisikhulu esiphezulu kule nhlangano.
Obekuseqhulwini kule nguyazana bekuwukubhunga kabanzi ngodaba lweThwihli Thwahla oseluhudulele phansi isithunzi sale nhlangano eyengamele ibhola eNingizimu Afrika kusukela ngonyaka ofile.
Osekusele wukuthi izikhulu zamaqembu esigaba esikhulu, iBoard of Govenors, zivote ngendlela ezibona ngayo ngalesi siphakamiso sokudingisa leli qembu laKwaZulu-Natal.
Abazazi zonke ezePSL bahlebele leli phephandaba ukuthi sekunesikhathi i-Exco iyimunyunga eyokudingisa i-AM kodwa bekunehlansi yethemba lokuthi umqoqintela, iSouth African Revenue Services (Sars), uyobe esemtholile umnikazi omusha maphakathi nenyanga edlule.
Yize lungavelanga usuku kodwa izikhulu zamaqembu esigaba esikhulu se-PSL zizohlangana maduze ukuzophikisa kumbe avumelane lesi siphakamiso se-Exco.
IThwihli Thwahla igcine ukudlala ngoDisemba 29 nyakenye, lapho ishaywe khona yiTS Galaxy ngo-3-1 emdlalweni weligi.
Kusukela lapho, leli qembu libhekane nezinselelo zemali eziholele ekumisweni kwayo yonke imidlalo yalo kwiPremiership. Ngaphambi kwalokho, kumiswe elidlala kwiDStv Diski Challenge (DDC) ngenxa yokwehluleka ukuhlanganisa isikimu esizodlala.
USars ufake leli qembu ngaphansi komlawuli, uJaco Venter, ngenxa yesikweletu sentela sika-R40 million somphathi we-AM, uShauwn "MaMkhize" Mkhize.
Lokhu kuholele ekutheni leli qembu lihluleke ukukhokhela abadlali nabanye abasebenzi imiholo kaDisemba nyakenye.
IRoyal AM isadlale eyeligi engu-11 okuzitolika ngokuthi ngeke isakwazi ukuqedela imidlalo esele ngayo ngisho ngaye iyathengwa.
Okwenza sishube kakhulu isimo se-AM wukuthi amaqembu aseqalile ukuzitapela abadlali okukhona kubona abathathu asebejoyine iLamontville Golden Arrows.