NAMHLANJE wonke amehlo athe njo kumculi wasesigodini saKwaNxamalala, eNkandla, uSabelo "Limit" Nala njengoba sekungumlingo ongamvimba ekukhaleni amuke nomklomelo weQuantum kwiMother of All Maskandi Festival, ePeople's Park (ngaseMoses Mabhida Stadium), eThekwini.
ULimit (25), wodumo lwengoma ethi Iyeke Leyondaba nethi Awuhlabe Kabili, uyena okugcine eqengqeleza phambili ngamavoti kulo mqhudelwano.
Lo mculi, oqale ukuduma nge-albhamu esihloko sithi Dankie San ngo-2021 nethi Mathematics ngo-2022, uxinwe wuzakwabo uMenzi Mabizela waseMnambithi noZwelethu "Solwazi" Malunga waseMzimkhulu, olele isithathu.
Lesi sioco sazibulwa wuKhuzani "Gatsheni" Ndlovu nyakenye,okunguye ozonandisa nge-golden hour ngo-12 waphakathi kwamabili.
Lezi zinsizwa zizobe zisina zidedelana esiteji naMawele Kamamtshwawe, Inkosi Yamagcokama, Amankonyane, Qalindaba, Amavikelambuso, Zinja Ziyamluma (waseZimbabwe), Lagxabha, DSD, Mlabalaba, Imfezemnyama, Sminofu, Omhlabuhlangene, Thandazani, Qhosha, Skweletu, Mkhulekelwa, Bhasini Lamula, Bahubhe, Cevuzile, Amageza Amahle, Khaza, Ezechalaha, Gadla, Falabo, Muhle Zondo, Maganga Thishela, Abafana BakaMgqumeni nabanye.
Abanye abazobe benandisa kule ndumezulu yomcimbi ngoShwi, Mfiliseni Magubane, Dr Buselaphi, Thandeka Hadebe, Ndoni, Gandaganda, Igeza LakwaMgube, Khuzani nabanye. Kwabazobe bephethe uhlelo kubalwa uTshatha Ngobe, Zimdollar, Mashudula, Modelkazi, Kiss Before, Mfanuphetheni, Zama Mseleku, Slow Mtshali, MC Mshazi nabanye.
Amathikithi okuthamela lo mcimbi atholakala eTicketPro, Shoprite Checkers, Spar naseComputicket ngemali ehlukahlukene.
