PHEZU kokuba kubhekwe ukuthi iRoyal AM ibuyele enkundleni uma isixazululekile eyabaphathi abasha kodwa kubukeka kuzoba nezingqinamba njengoba amaqembu eseqalile ukuyiphundla.
Kulindeleke ukuthi kumenyezelwe abaphathi abasha beqembu kulandela ukuhoxiswa kukaRoy Moodley obeyithenge esidlangaleni idayiswa ngumqoqintela, iSouth African Revenue Services (Sars) emasontweni adlule. UMoodley oyimpunyela yaseThekwini, uhoxiswe ngenxa yokwehluleka ukukhokha imali esikhathini ebesinqunywe iSars. Ngalokhu, kulindeleke ukuthi i-AM idlulele kwezinye izandla. Emuva kwalokho, isigungu esengamele iPremier Soccer League (PSL) Executive Committee (Exco) sizonquma ngokuzokwenzeka ngemidlalo ehlalele leli qembu elidlale engu-11 kuphela kule sizini.
Uma kunqunywa ukuthi i-AM ibuyele enkundleni, kubukeka izoba nezinye izinselelo kwazise abadlali bayo abayizithenjwa sebethathwe ngamanye amaqembu kwiBetway Premiership. Kulaba badlali kubalwa u-Ayabulela Maxwele, Shadrack Kobedi noSabelo Sithole asebedlalela iLamontville Golden Arrows. UMaxwele noKobedi badlalile ngesikhathi Abafana Bes'thende behlula iKaizer Chiefs ngo 2-1 eThekwini, ngoMgqibelo. Abanye abadlali okuvela ukuthi sebeyishiyile iThwihli Thwahla nguKhulekani Shezi okhonjwa kwiSekhukhune United, Sbangani Zulu noMfundo Thikazi abamataniswa neRichards Bay. Kuthiwa uMaxwele, Kobedi, Shezi noSithole basizwe ngabameli ukuze bathole izincwadi zokubakhulula kwi-AM.
Umthombo ongaphakathi kwi-AM uqinisekise ukuthi bayisihlanu abadlali asebeshiyile eRoyal Ranch futhi wathi sekunamasonto behambile.
Umqeqeshi we-Arrows, uManqoba Mngqithi, uzwakalise ukujabula ngabadlali abatholile.
"Angazi ukuthi sibathole kanjani kodwa ngiyajabula ukuba nabo," kusho yena sakuncokola.
"Ukuthi kwenzeke kanjani, ngeke ngikutshele. Kodwa iqiniso lithi kuyajabulisa ukuba nabo. bangabadlali abahle kakhulu. Bazokwenyusa izinga lethu siyiqembu."