ISIHLOKO: The Sound of Magic
UMCULI: Mawhoo
UHLOBO: Amapiano
UMHLAZIYI: CHARLES KHUZWAYO
INONILE indawo yaseShowe ngokukhiqiza amaciko afana noMawhoo, Zama Ngcobo, Linda Sibiya, Winnie Ntshaba, Qhosha Sibisi, Gadla Nxumalo, DBZ Ntuli, Nakanjani Sibiya, Mbuso Khoza, Nelisiwe Sibiya nabanye osaziwayo.
UMawhoo, ogama lakhe langempela nguThandeka Ngema, uhamba ezinyathelweni zala maqhawe ngokuqhakambisa le ndawo.
UMawhoo ngomunye wamaciko esifazane afike kwezwakala emculweni wamapiano. Ngiqale ukumvuma nyakenye ngomucu owawuthi Thokoza ngo-2022.
Waphinde washayela isipikili sokugcina ngengoma eyayithi Ngilimele nethi Nduma Ndumane nyakenye.
Kulo nyaka ukhuze ibuya ngonqambothi lwe-Extended Play (EP) elisihloko sithi The Sound of Magic. Nalo lulandela ulozolo lwe-EP eyayithi The Chosen.
Isingeniso saleli cwecwe esisihloko sithi Emaweni, sikwenza kugqame ukuthi le ntokazi iphiwe izwi. Iphimbo likaMawhoo lingahlabelela nanoma yiluphi uhlobo lomculo.
Sengiyabona ukuthi kungani uMawhoo eselandelwa nangosaziwayo abadume umhlaba wonke abanjengoJay Z, Lil Wayne noRick Ross.
Kule-EP enamanoni amahlanu kupikwe oKabza De Small, DJ Maphorisa, Nkosazana Daughter, Tycoon, Noxolo Ngema, X-Wise no-Omit ST.
Izingoma eziboshelwe lapha ngezithi Ukwamukela, Isiphiwo, Qinisela nethi Moya Wasemandulo. Ngisithandile isigqi seSiphiwo nomyalezo wale ngoma. Ngamafuphi ithi engadalelwa khona kuyofika noma kungafika sekushone ilanga. Ikhuthaza nanoma wubani ukuthi ungasheshe uphonse ithawula. Nomyalezo wethi Qinisela uyakhuthaza. Ingoma ethi Umoya Wasemandulo iwumthandazo. Okwenza uMawhoo ahluke kozakwabo ukuthi uyena ugabe ngezwi elimtoti kanye nezingoma ezinomyalezo.
Ngakho uma uzifela ngesigqi samapiano, esithakwe nomzwilili wezwi, nomakanjani uzogezeka ubebebe.