ABANTU ebebeqhamuka ezifundazweni ezihlukene badele imvula ebiyidliva, isiphepho nodaka banikela emcimbini iLast Dance Music Festival ebise-Oval Cricket Stadium, eMgungundlovu ngeSonto.
Nakuba umcimbi uqale sekwedlule isikhathi ngenxa yemvula ebihambisana nesiphepho esinamandla, kodwa abantu abaphelanga moya.
Batheleke ngobuningi babo futhi bajabula sengathi kuthiwa unyaka uzobhujiswa. Kubaculi abashiye izithameli zisahalela impinda kubalwa uBabes Wodumo, Nomfundo Moh, Xowla, Mthandeni SK, Scorpion Kings (Kabza De Small noMaphorisa), Sjava, Focalistic, Big Zulu, Nasty C, Lwah Ndlunkulu, Goldmax, Happy Gal nabanye abaningi.
Nabaphathi bohlelo, okubalwa kubo uHlelo woZalo noNomalanga Shozi, bageze izithameli ubebebe.
Osikhwiliphambananobhokhoko bayisuthile induku konogada ebebengahleki nanoma yini.
IMeya yaseMsunduzi, uMzimkhulu Thebolla, ithe beyililindele lelisasasa ngoba awukho omunye umcimbi owedlula iLast Dance Music Festival ngobumnandi. UThebolla uthe bekufanele abantu baphume ngobuningi babo ngenxa yokuthi uMgungundlovu iNhlokodolobha yaKwaZulu-Natal futhi idolobha lakhona libizwa ngeCity of Choice.