UMLINGISI obenguThenjiwe MaMzobe Gumede kuMkhokha: The Curse noMaNgema kwiRedemption, uDeli Malinga, ufike wabaqwaqwada amakhanda kuma-3rd Ladies In Media Awards '24 eGhana ngoLwesithathu.
UDeli odabuka eMlaza, ukhale wemuka ngomklomelo weBest African Female Actor of the Year, equmba phansi uzakwabo wakuleli u-Asavela Mqokiyana, Nyokabi Macharia waseKenya, Jasmine Barond waseGhana, Podita Agu waseNigeria, Chugga Queen waseTanzania noWanjira Longauer waseKenya.
UDeli ukholelwa ukuthi ukusebenza ngokuzikhandla nokuhlonipha umsebenzi wakhe okumenze wafinyelela kuleli zinga asekulo njengoba eseyindlovukazi yase-Afrika emkhakheni wokulingisa.
Lo mlingisi uhlabana nje kumaLadies In Media Awards akafinyelelanga kalula emcimbini kodwa kuze kwadingeka ukuba afongqe isigqoko acele uxhaso athi uze waluthola kwiKZN Tourism and Film Authority nakwabanye abangani abathole ezinkundleni zokuxhumana.
Nakuba kunjalo, uthe kukhona abamtshele emehlweni ukuthi useyabaqola. Le ntokazi eyaqala ukwaziwa njengonkosikazi kaKhaphela kuGenerations endala, uSarah Ngcobo, beyingaqali ukudla umhlanganiso ngalo mqhudelwano wezindondo.
Iqale ukuvelela emincintiswaneni yakuleli. Ngo-2023, uDeli uhlabane ngemiklomelo eminingi okubalwa kuwo oweBest Supporting Actress in a Telenovela kumaSouth African Film and Television Awards (Saftas) ngendawo ayilingisa kwiRedemption.
Nyakenye uhlabane ngendondo ye-Outstanding Perfomance kumaNational Film and TV Awards South Africa ngendawo kaMaMzobe.
Akagcinanga lapho, ngawo unyaka owedlule uDeli wakhala wemuka nendondo yeBest Actress kumaSimon "Mabhunu" Sabela Awards.
Ngaphandle kwale midlalo, uDeli usebuya kweminingi okubalwa kuyo iMrs Mandela, iNkaba, A Zulu Christmas, Shaka Ilembe, Clean Job, Disaster Holiday ne-Adulting.
*Kuze kwashaya isikhathi sokushicilela eminye imiphumela ingakatholakali kumaLadies in Media Awards.
.