I-KINGS of the Weekend, okunguDJ Sphectacula noDJ Naves, ithi inikezwe umsebenzi wokuzama izinto ezintsha ohlelweni lwayo kwiGagasi FM, ngemva kokuvuselelwa kwenkontileka yayo.
IGagasi FM limemezele izinguquko ezimbalwa ezinhlelweni zalo kusuka ngo-Ephreli 1, njengoba kuqala unyaka omusha wezokusakaza emisakazweni eminingi.
Ezinhlelweni zango-6 ekuseni kuya ku-6 ntambama phakathi nesonto azikho izinguquko ngaphandle kokuhamba kukaZisto Mhlongo, ohlelweni lwango-3 kuya ku-6 iGagasi FM Fast Lane.
Ukuhamba kwakhe kushiya uSphe, noNaves ababuye kulesi siteshi ngonyaka odlule.
Ngempelasonto uMkay Music ukhishiwe ohlelweni iThe Lounge ngo-2 ntambama kwafakwa uNkulee Mbatha.
UDJ Sphe Live usesele yedwa ohlelweni olungena ngo-6 ntambama ngeSonto kulandela ukuhamba kukaNelisiwe Sibiya.
Ohlelweni abelusakaza ngoLwesihlanu ngo-10 ebusuku kufakwe uMkay Music noSiphokuhle kuthi kwabelusakaza ngesikhathi esifanayo ngoMgqibelo kwangena uDJ Vumar.
Bekhuluma naleli phephandaba uSphectacula uthe ukusayina kwabo omunye unyaka kuwubufakazi bombono iGagasi ofanayo abanawo nesiteshi.
“Enikubonile nenikuzwile bekusawunyaka wokuqala wohlelo lwesikhathi eside sokushumisa intambama emsakazweni,” kusho uSphectacula.
Uthe banikwe umsebenzi wokwenza izinto ngendlela engajwayelekile futhi yikho kanye abazokwenza.
Ephawula ngokuhamba kukaZisto uNaves uthe ubeyisinongo esimangazayo isiteshi ebesisifake ohlelweni.
“Ngiphatheke kabi ngokumbona ehamba kodwa futhi ngivule inhliziyo ngokuthi ahambe ayobheka amanye amadlelo. Ukuthola amava athe xaxa kulo mkhakha kuyikho konke futhi uma ungasinyelanga isihlahla njengoba ensile, amathuba okuthi sisebenze ngomuso akhona. Njengomndeni weGagasi FM simfisela konke okuhle,” kusho uNaves.
Ngaphandle kokusakaza uNaves uthe kunomculo omusha abazowikhipha.
“Sinohlelo lwethelevishini futhi olusezinhlelweni bese kuba amathuba ebhizinisi esiwazamayo esizoveza ngawo uma esechuma ngokuhlela kwethu. Akhuluma ngento esiyithandayo okuwukuvulela amathuba abeza ngemuva. Sengijahe kabi ukuthi abantu bathole kabanzi. Okwamanje siyekeni sipheke,” kuphetha uNaves.