USIHLALO weRichards Bay FC, uSifiso “Jomo’’ Biyela, ubona esefanelwe wukuthola indawo kwiBafana Bafana umdlali wabo wasemuva uKeegan Allan oshaya into ecokeme kule sizini.
U-Allan (24) usayine kwiNatal Rich Boyz ekuqaleni kwesizini ka-2024/2025, esuka kwiSuperSport United ahlale kuyona izinyanga eziyisithupha. Ungomunye wabadlali abakhonjwa indlela yiMoroka Swallows maphakathi nesizini edlule kulandela isiteleka esasithinta amaholo.
U-Allan odlala maphakathi emuva, ufike kwiBay wadlala ngokukhulu ukuzwana nokaputeni uSimphiwe Mcikeka. Emidlalweni eyisikhombisa yeBetway Premiership, iBay ingenelwe ngamagoli ayisihlanu. Igoli enalo kule sizini, lishaywe ngu-Allan ngesikhathi behlula iTS Galaxy ngo 1-0 eMlaza, ngoSepthemba.
UBiyela uthe u-Allan, owakhuleka enkulisa yeMamelodi Sundowns, kufanele angene kwiBafana. Endaweni ka-Allan kwiBafana, umqeqeshi uHugo Broos, ubiza abadlali okukhona kubona uRushwin Dortley weKaizer Chiefs, Nkosinathi Sibisi we-Orlando Pirates, Mothobi Mvala noGrant Kekana beSundowns.
“Uma bebuka leli bhola esilibukayo, ngicabanga ukuthi iqiniso lithi kumfanele ukudlala kwiBafana. Yiqiniso lelo. Uma ubheka futhi iminyaka yakhe yobudala, isamvumela. Noma yikanjani uzongena kwiBafana. Ngiyazi ukuthi sewake wabizwa kodwa ngendlela adlala ngayo manje nabambe ngayo umgqigqo, ngicababnga ukuthi yena noMcineka bengakha ukhonkolo emuva eqenjini lesizwe,” kusho uBiyela.
U-Allan kulindeleke ukuthi asize iRich Boyz ibuye namaphuzu kwiKaizer Chiefs abazobhekana nayo ePeter Mokaba Stadium, ePolokwane, namuhla ngo-7.30 ebusuku. Ukugqoza kwamaphuzu namagoli kwiBay sekusabalalise amahlebezi okuthi uzulelwa ngamanqe umqeqeshi, uBrandon Truter, ongene endaweni kaVusumuzi “Kanu” Vilakazi owayisindisa ezembeni ngesizini edlule.