IPremier Soccer League (PSL) isinqume ukumisa imidlalo yeRoyal AM ehaqwe yizinxushunxushu.
NgoLwesithathu ntambama, iPSL ikhiphe isitatimende imemezela ukuthi umdlalo weBetway Premiership leli qembu obekufanele liwudlale ne-Orlando Pirates ngoLwesine ebusuku eHarry Gwala Stadium, eMgungundlovu, usuhoxisiwe. Ngaphezu kwalokho, i-AM ihoxisiwe nasemidlaweni yeNedbank Cup neyeligi ezolandela kuze kuba iPSL imemezela okuhlukile. Ngokusho kwale nhlangano, iThwihli Thwahla yehlulekile ukuthumela incwadi (Letter of Comfort) evela kuyona nakumlawuli ojutshwe yi-SARS, esilawula izinto qembu, okuvunyelwane ngayo emhlanganweni obungoJanuwari 17. Le ncwadi eyokuqinisekisa ukuthi yonke imibandela yenkontileka i-AM izohambisana nayo.
Ngokusho kwePSL, isigungu i-Executive Committee (Exco) sizohlangana futhi ngoLwesihlanu ngo-11 emini ngenhloso yokunika i-AM, ngaphansi kukamlawuli, ithuba lokwenza izethulo ngalolu daba. IThwihli Thwahla ayikaze idlale kulo nyaka. Umdlalo weligi wokuvula unyaka obekufanele iwudlale neChippa United, icele ukuthi uhlehliswe kulandela ukungabuyi kwabadlali abebekhala ngokuthi abayitholanga imiholo kaDisemba.