LIBUYE selilandela ngemuva iqembu leKaizer Chiefs elidlala kwiDStv Diski Challenge, linqoba i-Orlando Pirates ngo 2-1 ngoMgqibelo ntambama, emdlalweni obuseDobsonville Stadium.
Lo mdlalo kwakufanele udlalwe ngoNovemba 17, wagcina ubhuntshile ngenxa yezulu elaliduma liphinde lishaye umbani.
Kuyiwe ekhefini zibambene ngo 0-0 kodwa womabili amaqembu awatholile amathuba okushaya amagoli esiwombeni sokuqala.
Ezimnyama zigadle kuqala ngegoli elivalelwe nguMmatlou Sepale ngomzuzu ka-74. Kudlule imizuzu emibili kuphela ngaphambi kokuthi Amakhosi athole igoli lokulinganisa ngephenathi ebekwe enethini ngu-Aden McCarthy.
Kuthe sekubhekwe ukuthi lezi zinkunzi zaseSoweto, zizocazelana amaphuzu kwaqhamuka uNkosana Mbuthu walibeka phakathi esikhathini esengezwe ngunompempe, ezakhe zemuka nawo ephelele amaphuzu.
Lo mphumela ukhuphule iChiefs wayibeka endaweni yesibili kwi-log ngamaphuzu ngamaphuzu angu-27 emidlalweni engu-12. Isele ngamamabili eqenjini eliqhwakele iStellenbosch FC, eselidlale imidlalo engu-13.
EzikaMagebhula zisahlezi endaweni yesishiyagalombili ngamaphuzu angu-19 emidlalweni engu-12.
Khonamanjalo, iSuperSport United inyukele endaweni yesine kwi-log ngokunqoba iSekhukhune United ngo 1-0 ngoMgqibelo ntambama, komunye umdlalo obuseDobsonville Stadium.
Igoli lokubika kulo mdlalo lishaywe nguManelisi “Sugar” Mazibuko sekusele amanenjana ukuthi umdlalo uphele.
Amatsatsatsa anyukele endaweni yesine kwi-log ngamaphuzu angu-25 emidlalweni engu-13. IMamelodi Sundowns, ebingadlali kule mpelasonto, isisendaweni yesithathu ngamaphuzu angu-26 emidlalweni engu-12.
Emsileni kusahlezi iMarumo Gallants, esacoshe amaphuzu amathathu kuphela emidlalweni engu-12. ILamontville Golden Arrows esendaweni ka-14, isathole amahlanu emidlalweni engu-12.
Lena bekuyimidlalo yokugcina kwiDStv Diski Challenge kulo nyaka. Imidlalo elandelayo izodlalwa ngoJanuwari 11 ngonyaka ozayo.