UMMELI ecaleni lokubulawa kukaSenzo Meyiwa u-Advocate Thulani Mngomezulu, uthe uzizwa engaphephile emuva kokugasela kwamadoda amabili kwakhe ezintatha zangoLwesithathu.
UMngomezulu omele ummangalelwa wokuqala uMuzikawukhulelwa Sibiya, ubike lolu daba enkantolo ngesikhathi kuqhubeka icala.
UMeyiwa owayeyisilomo se-Orlando Pirates neBafana Bafana, wadutshulwa wabulawa ekubo kwentombi yakhe uKelly Khumalo, eVosloorus, eGauteng ngo-2014.
UMngomezulu owajoyina icala seliphakathi, ubikele iJaji uRatha Mokgoatlheng ngamadoda asolisayo afike kwakhe.
Uthe unezinsolo zokuthi kuhlobene nokusebenza kwakhe kuleli cala.
UMngomeezulu uqale wacela inguyazana neJaji, uMshushisi nabanye abameli bayoxoxa esithe.
Babuya lapho laqhubeka icala kodwa lithe selisongwa base belikhumbuza iJaji.
IJaji libe selendlala udaba esidlangaleni njengokucela kukaMngomezulu.
“Ngithole umbiko othusayo kuMngomezulu engibikela ngesigameko asola ukuthi sihlobene naleli cala.
Ubike ngamadoda amabili afike emzini wakhe egcaluza ngendlela esolisayo ezintatha.
Ngenhlanhla izinja zibhoke kakhulu, zawaphazamisa la madoda abezama ukungena,’’ kusho iJaji.
IJaji lithi uMngomezulu akaneme neze ngoba usola ukuthi la madoda abezomenzakalisa futhi uzizwa engaphephile emuva kwesigameko.
“UMngomezulu uthi uyasola ukuthi laba balisa bebeze kabi kuyena befuna ukumenza okubi noma bambulale ngoba phela yizigameko ezenzekayo eNingizimu Afrika lezi,’’ kusho iJaji.
IJaji lithe uMngomezulu unelungelo lokuthi avikeleke ngoba ungumsebenzi wenkantolo futhi kungaba kuhle uma udaba engalubika amaphoyiseni.
Libe selinquma ukulweneka esidlangaleni udaba ukuze kwaziwe ukuthi uMngomezulu uyaphazamiseka emsebenzini.
IJaji libuze uMngomezulu ukuthi wenelisekile yini ngendlela eleneke ngayo udaba. UMngomezulu uthe kukhona afisa ukukwengeza ngesinye isigameko esithinta igama lakhe.
“Nakuba ngingeke ngikuhlanganise lokhu nalolu daba kodwa ngizokusho.
“Nkosi yenkantolo iKaya FM ixoxe noChicco Twala ngobufakazi bukaSifiso Meyiwa, ethi angiwazi umsebenzi wami, akazi ukuthi ngimfakelani kuleli cala,’’ kusho uMngomezulu ngokukhathazeka.
UMngomezulu ubesanda kuveza ukuthi isitatimende sikaMeyiwa (uSifiso), siveza ukuthi uSihlalo we-Orlando Pirates nePSL, uMnuz Irvin Khoza wathi umufi akabulawanga yizigebengu.
UMngomezulu uthe uzobiza uChicco, uKelly noKhoza bazofakaza ngabakwaziyo kuleli cala.
Abameli baqedile ukupheka ngemibuzo ufakazi owumphenyi uSergeant Batho Mogola. Icala liyaqhubeka namuhla, uMbuso uzokhomba indlela.