USENKINGENI umculi kamaskandi okusolwa inyanga emthwasisayo ukuthi isimphendule umkhovu wayo. Kuthiwa uselaxaze ngisho nomndeni wakhe, wakhetha ukuhlala nenyanga.
Isolezwe ngeSonto lithole ngomthombo walo ongashayi eceleni ukuthi umculi uSenzo Ngcobo, owaziwa ngoMasokanovalo emculweni, usephenduke umkhovu wenyanga.
“Selokhu ahamba ngoDisemba ngonyaka odlule, ethi uyothwasa enyangeni eNew Germany, ePinetown. Ufike kule nyanga washintshela umndeni wakhe njengoba engasafuni muntu womndeni kodwa uthanda inyanga kuphela. Emzini wenyanga uhlala ephithizela esebenza. Usedele ngisho unkosikazi nengane yakhe, walahla nomsebenzi. Okushayisa amakhala wukuthi usekhuluma nezinto engathi wumuntu olahlekelwe wumqondo. Emzini wakhe oseBonela, sekuhlala abantu abangaziwa, okuthiwa bafakwe wuyena ugobela wakhe,” kusho umthombo.
Kuthintwa unkosikazi kaMasokanovalo, uNkk Andile Ngcobo, uthe akasazi ukuthi yini okumele ayenze ukubuyisa umyeni wakhe.
“Sengike ngaya izikhathi eziningana enyangeni lapho ethwasa khona. Inyanga ifike inqabe ngisho ukungingenisa ngaphakathi. Ikhuluma nami ngisesangweni, ingitshele ukuthi kumele ngibhukhe uma ngifuna ukungena kwayo. Kwesinye isikhathi ibiza yena umyeni wami, ukuthi azokhuluma nami. Afike angixoshe athi ngihlangene nobaba, sifuna ukumbulala. Njengomuntu esengihlale naye isikhathi eside, kuyazwakala ukuthi kukhona okungahambi kahle kuyena emqondweni, ngendlela aseyiyona. Emzini wenyanga usephenduke isisebenzi sakhona,” kusho uNkk Ngcobo.
Uthe okubuhlungu wukuthi ngisho nasemzini wabo oseBonela, ukhishiwe kuwona ngabantu angabazi, abamtshele ukuthi bangamathwasa enyanga ethwasisa uMasokanovalo. Uthe bangene ngenkani emzini wabo, bahlala khona bathi yinyanga yabo ethe mabahlale khona. Kumanje uthe ubuyele kubo ngoba uyasaba ukuhlala nabantu angabazi abafakwe emzini wakhe ngenkani yinyanga.
Omunye umculi kamaskandi, uMbuzeni Mkhize, onenkampani obekuqopha ngaphansi kwayo uMasokanovalo, uthe bakhathazekile ngalo mculi. Uveze ukuthi akukho abangakuzamile ukuthi umculi abuye enyangeni kodwa okucacayo wukuthi kwayena sengathi akasazazi nokuthi ungubani.
Abelaphi bendabuko bathe indlela okwenzeka ngayo kulo mculi kukhomba ukuthi uthwetshuliwe. Uzamokwakhe “Bhaka” Nzama uthe inkinga uma engashona lo mculi uzoba yidlozi eliyingozi emndenini wakhe. Wathi kumele balusukumele udaba lwakhe esaphila, kodwa ngeke akuveze kwabezindaba okumele umndeni ukwenze ngoba uzobe enika inyanga emthwebulile amaqhinga. Uthe kodwa angakhuluma nomndeni eceleni. Enye inyanga, uKhumbulani “Mabalengwe” Ntombela, ithe sekumele kuhlangane isigungu sabelaphi bendabuko nayo inyanga esiphendule umculi umkhovu wayo. Uthe alikho idlozi elenza umuntu ahlupheke ebe esathwasa kodwa kusuke kuyimikhuba nje yenyanga efuna ukusebenza ngamandla alowo muntu emthwasisayo.
Imizamo yokuthola uMasokanovalo, ayiphumelelanga njengoba ucingo lwakhe lulokhu luvaliwe, inamba yenyanga ayitholakalanga.
