UMAKADEBONA emculweni we-jazz, uThemba Mkhize, uzofukula ngolwazi ozakwabo abasacathula kule ndima.
Lokhu kuzokwenzeka emcimbini wokwethulwa kochungechunge lwamakhonsathi e-jazz eBat Centre, eThekwini ngeSonto kusukela ngo-1 emini.
Ngokusho kwesitatimende esithunyelelwe imithombo yezindaba ngabagqugquzeli, abathandi bomculo we-jazz bazobuye bazitike ngomculo ozobe uqhululwa wuMkhize, Umkhumbane Jazz Ensemble, uParas "Sibalukhulu" Dlamini, iTalent and Talented Band, Light and Salt Band neDurban High School Jazz Combo.
Isolezwe lithole ukuthi la makhonsathi, abizwa ngeThekwini Jazz Sessions, azoba yizinyanga eBat Centre ngenhloso yokujabulisa abalandeli balo mculo ongasoze wabuna.
"AmaThekwini Jazz Sessions uchungechunge lwemicimbi ye-jazz eyenziwa ngenhloso yokuthuthukisa nokweseka lolu hlobo lomculo kuleli dolobha."
Siqhubeka isitatimende sithe leli dili likaMkhipheni lizobe lihambisana nezinkundla zokucobelelana ngolwazi. Lolu hlelo luqale ngoFebhuwari lapho uMasipala waseThekwini ukhethe amabhendi e-jazz azonandisa kulama khonsathi ngohlelo lwenhlolokhono.
Ebebesekhaleni lokuhlunga amabhendi azobamba iqhaza kulolu chungechunge yingwazi esizakhele igama nasemazweni angaphandle uNduduzo Makhathini nothisha onolwazi olunzulu ngalo mculo njengoba ewufundise nasezikhungweni zemfundo ephakeme, uSusan Barry.
"Amaqembu asafufusa azothola ithuba lokubhulela amazolo izinkakha zabaculi be-jazz zaseThekwini."
Kunxuswe abathandi bomculo we-jazz ukuba baphume ngobuningi babo ukuzothamela umcimbi wokwethulwa kwalolu chungechunge.
Yize kungenwa mahhala kodwa isihlalo sibekiswa ngokuthinta uSipho Mtshali ku-031 322 7790/1.
