UYELASHWA esibhedlela uphrojusa wodumo lwengoma ethi Bhutiza nethi City Rains, uMabi "Mobi Dixon" Ntuli, emuva kwengozi yemoto ehlasimulisa umzimba emehlele.
Izindaba zokulimala kukaMobi Dixon (39) zidalulwe yithimba asebenzisana nalo ngesitatimende elisinameke emakhasini asezinkundleni zokuxhumana alo DJ.
Ngokusho kwesitatimende, uMobi Dixon wase-East London, e-Eastern Cape, uthola ukulashwa okusezingeni eliphezulu kodokotela.
"Sifisa ukubonga ethimbeni lodokotela ngokweseka nangobuchwepheshe babo, umndeni nabangani abanaye (uMobi Dixon) kulesi sikhathi esinzima."
Siqhuba isitatimende sinxuse amalungu omphakathi ukuba anikeze uMobi Dixon isikhathi esanele sokululama.
"Sicela ukuba anikezwe ithuba lokuba yedwa nokubekezelelwa emithonjeni yezindaba nakubalandeli ngalesi sikhathi. Sizolokhu sibazisa ngokuqhubekayo uma sekufike isikhathi esifanele. Yonke imicimbi kaMobi Dixon ihoxisiwe futhi sisazozimemezela izinsuku ezintsha. Siyabonga ngokuqonda nokuzwelana nathi," kuphetha isitatimende.
Kwenzeka lokhu nje uMobi Dixon usagqigqa eNkantolo yeMantshi yaseBloemfontein, kusukela ngoJulayi nyakenye, kulandela isigameko sokushaywa wumnikazi wendawo ehlala izivakashi emuva kokunandisa kuyo.
Wathi washaywa ngoMeyi 2023, icala walivula esiteshini samaphoyisa iPark Road eBloemfonteni ngoJuni 14. Kusukela ngoJulayi ulokhu egqigqa enkantolo njengoba icala lilokhu lihlehla. Ngo-2019 lo mculi wake wasolwa ngokuba yimbangela yokuzibulala kwentokazi ayecula nayo engomeni ethi Bhutiza, uNichume Siwundla, kodwa inkampani kaMobi Dixon yacela ukuthi lo mculi angahlanganiswa nalezo zinsolo.