INYANGA yaseThekwini u-Andile 'uMzimbokhalimali' Dlamini, ikhwele yadilika kwabesilisa abakipite nezintombi ngesikhathi yethula inkulumo, yokugubha usuku lwayo lokuzalwa ePrime Hotel, eMorningside ngoLwesibili.
Ekhuluma neSolezwe ngeSonto, uMzimbokhalimali, uthe lokhu ukushiso ukungaphumeleli kwabazali bakhe ukuthi beze emcimbini wokugubha usuku lwakhe lokuzalwa wathi kuyaqala ngqa, ukuthi bangabikhona.
“Ukubambeka kwabazali bami ngenxa yokuba matasa neminye imisebenzi yikhona okwenze ngakhuluma ngendaba yabantu abakipitile. Bengifuna ukuveza ukuthi babaluleke kangakanani abazali bami kumina nokuthi abantu bangafiki eThekwini bese bekhohlwa abazali babo. Iningi labesilisa uma liseThekwini ngokuzosebenza ligcina selikhohliwe imindeni yalo. Lokho kuyiphutha elikhulu. Noma ngingeke ngidalule amagama abantu kodwa baningi engibaziyo abenza kanje. Uthola ukuthi iningi labo bahlala emaflethini eThekwini, bakhokhele ngisho namaDStv abizayo kodwa emakhaya abakhile futhi ababanakile nabazali babo. Abanye abanawo ngisho umasingcwabisane, kuvela amahlazo uma sebeshonile ukuthi akukho ngisho imali yokuhambisa imizimba yabo emakhaya ngoba abazihlelelanga besaphila,” kusho uMzimbokhalimali.
Uthe abanye bashiye ngisho namakhosikazi nezingane emakhaya, abazondli kodwa baphila kahle eThekwini.
Uqhube wathi nabo beyizinyanga banesandla kulesi simo njengoba kuyibona abenzela abesifazane imithi yokuthi babambe amadoda.
“Uthola ukuthi unika umuntu wesifazane umuthi afuna ukubamba ngawo indoda yomuntu igcine ikhohlwe yikhaya. Le nto ayibi nawo umthelela omuhle ngoba isikhathi esiningi laba besifazane basuke bengashadile nalama doda abawadlisayo, okuthi uma sebecabanga ukuwashiya bese eyababulala. Noma abashadile benazo izinkinga kodwa abavamisile ukulwa njengalaba abangashadile ababambene ngomuthi. Baze bagcine sebebulalana ngoba uthola ukuthi indoda isuke isikhalela imali eyimoshe ngalowo muntu wesifazane osuke eyidlisile,” usho kanje.
Emcimbini wakhe uMzimbokhalimali bekucula iNkosi yamaGcokama, kukhona nomsakazi woKhozi FM, osomabhizinisi nabangani.
UMzimbokhalimali uthe le nkulumo yakhe iqoshiwe njengoba kunezinhlelo zokuthi akhiphe iDVD yayo.
UMZIMBOKHALI ushiye angalazi ngabesilisa abakipitile eThekwini athi bakhohlwa yimindeni yabo Isithombe: SITHUNYELWE