ABASEBENZI bakwaMTN banikelele umphakathi waseQuarry Road owashelwa iimijondolo yawo ngezinto ezibalulekile ezingaboli njengezingubo zokulala, izingubo zokugqoka, omata nokudla okungaboli.
Amalungu omphakathi angu-113 ashelwa imijondolo yawo ngenyanga edlule. Ngaphezulu kwezinto ezingaboli, abakwa-MTN babuye banikelela lo mphakathi ngamaphasela okudla okumqoka okunjengoshukela, impuphu, ilayisi, ufulawa, i-soya mince, iphalishi le-Ace, ingxube yesobho, ikhofi, itiye, ubisi oluyimpuphu namafutha.
Ikhansela lakule ndawo uMnuz Themba Mkhize, obehambisana nekomiti lentuthuko lakule ndawo. ubekhona ngesikhathi kunikezwa umphakathi lezi zimpahla.
UNksz Busi Dlamini oyimenenja jikelele yehhovisi lesifundazwe, uwanikeze yena mathupha amalungu omphakathi amaphasela okudla. UNksz Dlamini ubephelezelwa yithimba asebenza nalo kulo okukhona uNksz Portia Zondi, uMnuz Nkosi Madonda, uMnuz Zolile Gumede noMnuz Steven Venter.
"Lona umzamo wokukhombisa ukuzibophezela kwe-MTN ekusizeni umphakathi osebenza kuwo. Njengoba imindeni ethintekile yakha kabusha impilo yayo, i-MTN imi njengesibani sethemba esiletha induduzo ngezikhathi ezinzima," kuqinisekisa uNksz Dlamini.