Owayengumethuli we-Our Perfect Wedding abuye abe ngumlingisi, uNomsa Buthelezi-Shezi, usephumele obala ngezingqinamba abhekene nazo empilweni nangokomsebenzi.
UNomsa ufake ivideo kwiTikTok lapho evule khona isifuba ngokucwaswa kwakhe njengowesifazane othandana nobulili obufana nobakhe nomthelela okube nakho emsebenzini wakhe.
Lo mlingisi, obekhuluma izinyembezi zigcwele emehlweni, uthe uphatheke kabi futhi kunzima kuye. Uveze ukuthi ulahlekelwe amathuba omsebenzi kwezokungcebeleka ngenxa yobulili bakhe.
Ugcizelele ubunzima bokuba yilungu lomphakathi weLGBTQI+ embonini, yize inenqubekela phambili, kodwa isabhekene nokucwasa.
Uthe uphucwe amanye amathuba ngenxa yempilo yakhe.
"Kunabantu kule mboni abenze izinto ezimbi kakhulu kimi kodwa ngathula. Kunabatshontshe ulwazi lwami njengezimpisi ezimbethe isikhumba semvu. Angibutholanga ubulungiswa kodwa ngaqhubeka."
Uthe yize kunzima kodwa unethemba futhi waqinisekisa abalandeli bakhe ukuthi uzobekezela.
"Mhlawumbe lokhu kuzojabulisa izitha zami. Yazini kodwa ukuthi uNkulunkulu akaphumuli," kusho uButhelezi.
Abalandeli bakhe baphawule ngezindlela ezehlukene.
U @Penelope_Makala uphawule wathi kubuhlungu. Uthe kumele avuke azithathe kodwa ngebhadi ukujikelwa ngabantu kuhlale kukhona, kwenzeka nakuJesu.
U @__T_touch uthe: "Lokhu akulungile. Sengathi angaqina. Yingakho ngingasamboni kwithelevishini."
U @Beevatar uthe uNomsa ungumlingisi nomethuli wezinhlelo onethalente.
"Ngiyakhumbula ukuthi wagila izimanga elingisa indawo kaSlender emdlalweni iLockdown. Ngangikujabulela ukumbuka kwi-OPW!"