UKHUZA ibuya ekwethuleni umcimbi wezindondo amaMetro FM Awards, umsakazi ophinde abe umethuli wezinhlelo kuthelevishini uLuthando "LootLove" Shosha.
Lo msebenzi uzowenza ngokubambisana noSiyabonga Ngwekazi owaziwa ngelikaScoop Makhathini.
Umcimbi walo nyaka kulindeleke ukuthi ubanjelwe eMbombela Stadium, eMpumalanga, ngoMeyi 3.
Uyobe ususakazwa bukhoma kwiSABC 1 kusuka ngo-7.30 ebusuku.
ULuthando owenza uhlelo lwantambama emsakazweni iMetro FM, kanti ngonyaka odlule wayephethe uhlelo ngokubambisana noProVerb.
Ekhuluma ngokuphinde athole ithuba lokuphatha uhlelo kulo mcimbi, uLuthando uveze ukuthi ukubheke ngabomvu ukuphinde abe kubantu abaphambili ukubungaza umculo wakuleli.
“Njengomuntu onothando olukhulu ngendima yobumnandi esikuyo, ngikholelwa ekutheni amaciko ayawudinga umcimbi walolu hlobo ukuze nawo abone ukuthi umsebenzi wawo usho lukhulu kangakanani futhi siyawuhlonipha. Ngijabule ukuthi ngibe nethuba lokubamba umcimbi nozakwethu abahlukene, ngikubheke ngabomvu ukusebenza noSiyabonga. Sibonga neMetro FM ukwenza umcimbi walolu hlelo ukuze nathi sikhombise ithalente lethu," kuchaza uLuthando.
Uthe ukubhekile nakulo nyaka ukuba nomzuzu angeke awukhohlwe njengoba okuhle okwenzeka ngonyaka odlule kwahamba kahle konke futhi namanje akakakhohlwa.
“Bazokutshela ozakwethu abasendimeni yobumnandi ukuthi uma ulokhu unikwa ithuba elifana naleli uzizwa uthobekile. Sengijahe ukubona ukuthi mina nomkhaya wami uSiyabonga yini esizoyilungiselela abantu uma sesihlangene esiteji. Nginxusa wonke umuntu waseMpumalanga ukuthi azitholele ithikithi lokuba kulo mcimbi. Ngimema wonke umuntu ukuthi abuke uhlelo mhla seluzakazwa bukhoma," kuchaza yena.
Kulo mcimbi kulindeleke ukuthi kukhaphethi obomvu kubonakale u-Anele Zondo, ozobe ekhuluma nosaziwayo abazoba yingxenye yomcimbi.
UDineo Ranaka noL-Tido bona bazoba nezingxoxo nosaziwayo abazobe bewinile.