Basulwe izinyembezi abathandi bobumnandi ngokumenyezelwa kwezindaba zokuthi ekuqaleni konyaka ozayo kuzovulwa indawo yokusingatha imicimbi iDome entsha ngemuva kokuvalwa kwendala ngo-2021.
IDome endala yayiseRandburg, yavalwa ngemuva kokuthengwa yinkampani edayisa izimoto ezingamasekeni iWe Buy Cars. Yayizakhele udumo ngokusingatha imicimbi ehlukene okubalwa kuyo amakhonsathi omculo. Umrepha uCassper Nyovest wake wayisebenzisa enze umcimbi i i-#FillUpTheDome ngo-2015 ngaphambi kokundlondlobala asingathe imicimbi ezinkundleni zemidlalo.
IStadium Management South Africa imemezele ukuthi izovula iThe Dome entsha eNasrec, budebuduze neFNB Stadium.
IStadium Management yengamele izinkundla zebhola okubalwa kuzo iFNB Stadium, Orlando Stadium, neRand Stadium.
"Inkundla izoba ngenkulukazi ebhekele imicimbi yezokungcebeleka eNingizimu Afrika, izomumatha abantu abangaphezu kuka-10 500," kusho iStadium Management esitatimendeni.
Bathe izoba yikhaya lamaciko omculo ahlukene futhi isilomo saseNigeria uTems, sizoba nomcimbi khona ngoMashi 20 ngonyaka ozayo.
Kuthiwa inkundla ingaphinde ikwazi ukusingatha izingqungquthela, imibukiso nemicimbi yokwethula imikhiqizo. Bathe izokwakha amathuba omsebenzi.