UMSAKAZI weRadio 2000, uNtombikayise "Ntombi" Meso, uthi usekujahe kabi ukwethula ingwazi yomculo weR&B, uJeffrey Osborne, esteji ngenyanga ezayo.
UNtombi uthe usekulangazelele nokubona izethameli zitheleke ngobuningi bazo kwiYou Should Be Mine South African Tour.
Ugqugquzele abantu bakuleli ukuba bafike ngezinkani, beswenke beconsa futhi beziqhole ngamakha anuka kahle.
"Wozani nabangani nezithandwa zenu ukuze sibe nesikhathi esimnandi," kuphetha uNtombi ecaphuna ezinye izinhlamvu zengoma kaJeffrey Osborne okuqanjwe ngayo lolu chungechunge lwamakhonsathi akhe akuleli iYou Should Be Mine (The Woo Woo Song).
UNtombi uzobe esina ededelana nozakwabo, okungoTbose weKaya FM, uDavid Mashabela weRadio 2000, uMsizi Shembe weMetro FM noDJ Young.
Phakathi kwabaculi abazobhulela uJeffrey Osborne amazolo kubalwa uSelaelo Selota.
UJeffrey Osborne usekuqinisekisile ukuthi uzobe efike ngezinkani okokuqala ngqa futhi eqhulula amanoni athi Family, Stranger, You Should Be Mine namanye amaningi.
Lolu chungechunge luzoqala eGrand Arena eCape Town ngoMashi 20, ludlulele ePietermatizburg Athletic Stadium ngoMashi 23 naseSunbet Arena ePretoria bese imbenge isongwa e-Emperors Palace eGoli ngoMashi 29.
Amathikithi athengwa ubuthaphuthaphu eTicketpro, eSpar Payzone nasePostnet kuzwelonke.
