KUYAPHELA ukuba yimpohlo kolingisa indawo kaGatsheni emdlalweni okhonjiswa kuMzansi Magic phakathi nezinsuku ngo-8 ebusuku, Umkhokha: The Curse.
UKini Shandu, owaqala ukuduma ngokusakaza kwiGagasi FM nokwethula uhlelo lwethelevishini iDaily Thetha kwiSABC 1, ukhehle ingoduso yakhe u-Andile Khanyile njengoba ngesikhathi yemuliswa kubo esigodini esiseMlaza, eBhanganoma, KwaNongoma.
Isolezwe Ngempelasonto lizibonele ikhadi lesimemo komunye wemithombo yaleli phephandaba.
Kulo membeso kufike osaziwayo abahlukahlukene abasondelene nalo mlingisi owake wathi xinti emkhakheni wamahlaya.
Izithameli zijatshuliswe nangabaculi abahlukahlukene.
UKini kulezi zinsuku akaconsi phansi ngenxa yendawo kaGatsheni ehlekisayo.
UGatsheni yindoda eyishaya emuva naphambili ngoba isesigungwini sebandla lamaJudiya elingamfuni nalapho ehambe khona uMaMzobe kodwa yena ubuye athuthele uMaMzobe izindaba.
UKini, obuye abe ngumsunguli wamaSebenza Women Awards, udabuka endaweni yaseNseleni, eRichards Bay. Imizamo yokuthola ukuphawula kukaKini nengoduso ayiphumelelanga kwaze kwashaya isikhathi sokushicilela.