I-ORLANDO Pirates izibekisele indawo kwiCaf Champions League ibhaxabula AmaZulu FC ngo 4-0 komunye wemidlalo yokusonga isizini ka-2022/23 yeDStv Premiership, eMoses Mabhida Stadium, eThekwini, ngoMgqibelo ntambama.
IPirates ibibanga neSupersport United ukuqeda endaweni yesibili kwi-log yePremiership njengoba iqede endaweni yesibili ngamaphuzu angu-54, njengoba iSupersport ishaywe yiSekhukhune United ngo 1-0 emdlalweni wayo wokusonga isizini obusePeter Mokaba Stadium, ePolokwane.
Yize iSupersport ihlulekile ukuzibekisela indawo kwiChampions League, kodwa ukuqeda kwayo endaweni yesithathu ngamaphuzu angu-51 kwi-log kuyibekisele indawo kwiCaf Confederation Cup ngesizini ezayo.
Kanti iKaizer Chiefs ebivele ibhimbelwa yizinto iyisonge kabi isizini ishayelwa ekhaya yiCape Town City ngo 1-0 eFNB Stadium, eGoli.
Lokhu kusho ukuqeda endaweni yesihlanu kweChiefs ephinda yasonga isizini ilambatha.
Ngakolunye uhlangothi ukushaywa kweMarumo Gallants yiSwallows ngo 2-0 kuholele ekutheni leli qembu laseLimpopo ligawulwe yizembe ngokuqeda emsileni we-log yePremiership.
Kanti lokhu kube sekusindisa iMaritzburg United ezembeni yaqeda endaweni ka-15 kwi-log nosekuyinika ithuba lokuyodlala amaPlay-Offs namaqembu amabili eMotsepe Foundation Championship iCape Town Spurs neCasric Stars, ngoMeyi 28 kuya kuya kuJuni 14.
Kanti ngakolunye uhlangothi iLamontville Golden Arrows ibe yilona kuphela iqembu laKwaZulu-Natal elikwaze ukuqeda kwiTop 8 ngokudlala ngokulingana ngo 0-0 neChippa United, eNelson Mandela Bay Stadium, eGqeberha.
Kuvalwe ngehlahla emaqenjini aKwaZulu-Natal womahlanu ehluleka ukungena ku-Top 8. Kwale ngisho nakwiGolden Arrows obekubhekwe ukuthi izoshaya iChippa izibeke ethubeni elihle.
Isiyonke imiphumela yeDStv Premiership yokusonga isizini:
AmaZulu 0-4 Pirates; Chiefs 0-1 CT City; Sekhukhune 1-0 Supersport; Chippa 0-0 Arrows; Richards Bay 0-0 Royal AM; Swallows 2-0 Gallants; Stellenbosch 2-1 TS Galaxy