Crystal Lake (0) 0
Orlando Pirates (4) 6
I-ORLANDO Pirates idlulele kalula emzuliswaneni weLast 16 kwiNedbank Cup, inenebula iCrystal Palace emdlalweni weLast 32, eMbombela Stadium, eNelspruit, ngoMgqibelo ntambama.
EZimanyama sisheshe zacacisa zibekwa ukuthi azisinisi mahleza ngokukhombisa ukuthi “ingobhuti abadala” kwiCrystal Palace yaseBushbuckridge edlala kwiSafa Mpumalanga ABC Motsepe League. Isitobha salobo mpetha beNedbank bangesizini edlule, u-Olisa Ndah ungqomfele phakathi igoli lokuqala ngomzuzu wesine umdlalo uqalile kade kuyi-khona.
Akuphelanga imizuzu emingaki iPirates yathola elesibili ngomzuzu wesishiyagalombili ngephenathi evalelwe phakathi wuTapelo Xoki, kade kudlaliswe kabi u-Evidence Makgopa ngaphakathi ebhokisini ekeqwa wu-Adam Khumalo weLake.
URelebohile Mofokeng uvalele phakathi elesithathu ngomzuzu ka-11, kwathi uPatrick Maswanganyi wavalela elesine ngomzuzu ka-33 nokwenze zaya ekhefini iPirates ihamba phambili ngo 4-0.
Empeleni bekumele ziye ekhefini iBucs iqengqeleza phambili okungenani ngamagoli ayisithupha ukuba iwasebenzise ngendlela amathuba ewatholile ngesiwombe sokuqala.
Yize iPirates iqhubekile nokuba phezulu ngomdlalo nangesiwombe sesibili, ayikhombisanga lobu bukhali ebenabo ngesiwombe sokuqala. Nokho, yize kunjalo ikwazile ukuthola igoli lesihlanu ngomzuzu ka-51 elingqomfelwe phakathi wuXoki kade kuyikhona.
Okuqaphelekile kulo mdlalo wukuthi yize iBucs ibiwuthatha njengobalulekile ngokubophela isikimu esiqinile, umqeqeshi uJose Riveiro, ubanikezile ithuba nabadlali abangasalijwayele ijezi, okubalwa kubona uThabiso Lebitso, Thabiso Monyane noThalente Mbatha.
Kuphinde kwabonakala uTshegofatso Mabasa obedlala umdlalo wakho wokuqala ebuye kweZimnyama njengoba ebebolekiswe kwiMoroka Swallows. Nebala uMabasa ongene ngesiwombe sesibili kulo mdlalo, ubingelele ngegoli engqomfela phakathi igoli lesithupha ngomzuzu ka-78 kade kuyikhona.
EZimnyama zibuyela kweyeDStv Premiership ngokubhekana nePolokwane City ngoMashi 2, ePeter Mokaba Stadium, ePolokwane.