UMSHAYISIBHAKELA waseMthwalule, uPhikelelani "Stinger" Khumalo, wengeze amabhande aseNingizimu Afrika aphethwe abakwaKwaZulu-Natal engqimuza umpetha we-SA middleweight, uJohn "Section 10" Bopape waseGauteng.
UKhumalo (27) owayeka ibhola esedlala esigabeni seDStv Diski Challenge kwiLamontville Golden Arrows nakuMaritzburg United, unqobe ngamaphuzu empini ebisehholo edolobheni eMtshezi ngeSonto ebusuku. Womathathu amajaji abone yena njengomanqoba ngo 117-108, 118-109, 117-109 kulezi zimpi ebezihlelwe yiStarline Boxing Promotions kaZandile Malinga. Kuphele imizuliswano engu-12 uBopape esevuke phansi kathathu. Lokhu kusho ukuthi lo mpetha ubesedinga ukunqoba ngomngqimuzo womlalisa phansi ukuze agcine ibhande lakhe. Bekungokwesithathu uBopape evikela ibhande lakhe kumshayisibhakela waKwaZulu-Natal aliwina ehlula uNkululeko "Bulldog" Mhlongo waseShowe ngo-2022. Walivikela ngempumelelo kuSnamiso Ntuli waseMnambithi naku-Ayanda Mthembu waseMandeni. Ukuzenzela kubashayisibhakela baseKZN kukaBopape yikhona obekwenza akusho kugcwale umlomo ukuthi uzozidlela amahlanga kuKhumalo. Ngokuwina ibhande le-SA middleweight, uKhumalo wengeze kompetha baseMzansi abadabuka kulesi sifundazwe okukhona kubona uNkosingiphile Sibisi waseDundee noMapule Ngubane waseMgungundlovu.
Ngaphezu kwalokho, ubuyise kulesi sifundazwe ibhande elaliphethwe nguChristopher Buthelezi waseNquthu osewawaphanyeka emgibeni amagilavu. Ngaphambi kokuwina ibhande laseMzansi, unqobe ele-KZN Junior middleweight nele-ABU Sadc middleweight. Usahlulwe kabili ezimpini eziyishumi kusukela eqale isibhakela ngo-2020.