ISILOMO somculi wowokholo, uNtokozo Mbambo, sibuye nendondo ye-Artist of the Year Africa kumaPraise Achievement Awards eGhana ngesonto ebusuku.
UNtokozo, oke waba seqenjini iJoyous Celebration, ubeqhathwe noSinach (Nigeria), Nathaniel Bassey (Nigeria), Dr Tumi noBenjamin Dube bakuleli, Dunsin Oyekan (Nigeria), Evelyn Wanjiru (Kenya), Mercy Chinwo (Nigeria), Moses Bliss (Nigeria) noTim Godfrey (Nigeria).
Abanqobile kule miklomelo bebevotelwa.
UNtokozo uveze injabulo yakhe ngokunqoba ku-Instagram ngemuva kwemiklomelo.
“UNkulunkulu anibusise nonke enivotile. Ngiyabonga kumdidiyeli wami @nqbkm (Nqubeko Mbatha), inkampani yami yokuqopha @kokorecordsmusic, nabo bonke abantu abathintwe umculo wami,” kubhala uNtokozo.
Lo mculi usanda kuba sematheni ehlabana ngezindondo ezintathu kumaSouth African Music Awards ePitoli ngenyanga edlule.
Uthole eye-Album of the Year nge-albhamu iLavish Worship, Female Artist of the Year neyeContemporary Faith Music Album.