USAZIWAYO odabuka eNdwedwe, u-Ayanda Ncwane, unyelwe yinyoni esandleni ngokuthola ithuba eliyingqayizivele lokuphatha uhlelo emqhudelwaneni ohlanganise izihlabani zamazwe ngamazwe, i-Africa Choice Awards, e-Oriental Hotel eLagos, eNigeria, ngeSonto ebusuku.
Lezi zindaba zidalulwe ngabagqugquzeli bale ndumezulu yomcimbi ekhasini labo leFacebook. Bathe kuzobe kungekhona okokuqala umfelokazi wengwazi yomculo wokholo, uSifiso Ncwane, ilawula uhlelo kuma-Africa Choice Awards.
U-Ayanda, owayengumhleli weGospel All Stars Festival, ubuye wazakhela udumo ngokubamba iqhaza kwiReal Housewives of Durban yize engahlalanga isikhathi eside.
Imizamo yokuthola ukuphawula kuka-Ayanda ayiphumelelanga kwaze kwashaya isikhathi sokushicilelwa kodaba.
Akusiye yedwa u-Ayanda ozobe emele iNingizimu Afrika kodwa kunabanye osaziwayo bakuleli abanjengoThabsile Zikhali, obenguConstable Biyela kuZalo, noSweety kwiRockville, yena odlana imilala noYaya Mavundla, Faith Nketsi, Blue Mbombo, Blue Aiva, Kayleigh Schwark nabanye bakwamanye amazwe.
Sekuyinhlalayenza umchilo wesidwaba kuThabsie ukubungazwa emazweni angaphandle kunasekhaya.
UZakes Bantwini uqhathwe noDavido kanye noBurna Boy kwiThe Male Artist kanti noSho Madjozi ubhekene noTiwe Savage noTems baseNigeria kwiThe Female Artist.
Abanye bakuleli abaqokwe kulo mqhudelwano ngoThobani Dlomo Nzuza, Zolisa Xaluva, Pallance Dladla, Sthembiso Khoza, Sdumo Mtshali, Thapelo Mokoena, Bonang Matheba, Khosi Thwala, Thando Thabethe, Lethabo Mathatho, Andile Ncube, Khutso Thiledi beMetro FM, Kwenzo Ngcobo weThe Wife, Thabang Molaba, Ntuthuzelo Grootboom, Ama Qamata, Lunathi Mampofu, Khosi Ngema, Noxolo Dlamini,Donovan Goliath, Enhle Mbali Mlotshwa, Kgomotso Christopher, Gail Mabalane, Kim Engelbrecht, Sithelo Shozi, Cindy Mahlangu, Natasha Thahane,Zamani Mbatha, DJ Maphorisa, DJ Zinhle noNaked DJ, Mpho Popps, Ntosh Madlingozi noNdayi Nokeri.