UMCULI kamaskandi uKhuzani "Indlamlenze" Mpungose uthi nakanjani uzowuqopha umlando ngokudla umhlanganiso emncintiswaneni Ingoma Yonyaka esiteshini uMhlobo Wenene.
UKhuzani uqokwe ngengoma yakhe ethi Imbongolo apike kuyo uSphesihle.
Akuyena yedwa umculi waKwaZulu-Natal oqokiwe njengoba kukhona noMthandeni SK Manqele ngengoma i-Gucci apike kuyo uMawhoo.
UMthandeni akaqali ukuqokwa kuMhlobo Wenene kwazise nangonyaka odlule wayekhona nge-Paris ayishaya noLwah Ndlunkulu.
Ethintwa nangokuqokwa kwakhe emncintiswaneni wokuhlukanisa unyaka kuMhlobo nakuKhozi FM, uMthandeni uthe akukho azokuphawula.
"Ngizoba nesithangami nabezindaba lapho ngizocacisa khona yonke into. Cishe usuku lwaso ngizoba nalo kusasa. Ngizobe sengicacisa konke nangomcimbi wami engiwuhlelayo," kusho uMthandeni.
UKhuzani ukusho kwagcwala umlomo ukuthi ujabule kakhulu ngokuqokwa.
"Kuyaqala emlandweni ukuthi umculi kamaskandi ahlukanise unyaka kwesinye isiteshi. Ngizowuthatha nakanjani. Ubani oyinkinga laphaya?" kubuza uKhuzani.
"Ngiyabahlonipha abaculi esiqokwe nabo ukuthi bangiphelezele njengenjwayelo. Ngifuna ukuyoqopha umlando. Sengiwuqophile e-KZN. Ngimema bonke abantu baseNingizimu Afrika ukuthi bavule uMhlobo Wenene ngoDisemba 31."
Kwenzeka lokhu nje, abanye abantu abazibiza ngabalandeli bakaKhuzani babhale ezinkundleni zokuxhumana ukuthi bazolinda lo mculi abatshele ukuthi abavotele bani kwabaqhathwe kuKhozi FM.
Lo mculi uthe usamile ekutheni ngeke ayingenele imincintiswano yoKhozi FM.
"Okumnandi wukuthi ngiyohlukanisa kuMhlobo Wenene nawo ongaphansi kwe-SABC."
Uthe ngeke aphawule ngokuthi abalandeli bavotele bani.
"Angiwavimbi ama-Blue Nation (okuyigama abiza ngalo abalandeli bakhe) ukuthi angavotela noma wubani. Munye umholi wama-Blue Nation. Uma ngithi ngikhipha umyalelo kumele bazi ukuthi inkosi yabo ithe. Njengamanje abantu ake bavotele abamthandayo. Uma kunesidingo sokuthi bavotele bani ngizosho. Ivoti abalihlanganise kuloyo abamqokayo."
Selulonke uhlu lwabaqokiwe kuMhlobo Wenene lumi kanje:
UWMF1 - Amalanga Awafani - Mas Musiq
UWMF2 - Amahloni - Liema ft Nhlanhla Dube
UWMF3 - Amayeyeye - Tenza
UWMF4 - Abantu Bam - Mr Vee Sholo
UWMF5 - Bayeza - DJ Stax ft Thabie Ngethe
UWMF6 - Endaweni - Celeb Ozz ft Mr Vee & Zee Mbembe
UWMF7 - Gucci - Mthandeni SK ft Mawhoo
UWM8 - Imbongolo - Khuzani ft Sphesihle
UWMF9 - Kuvele Kukhanye - Lindo Mtangayi
UWMF10 - Ukuphumla - King Jade & Baby Joe ft DJ Rego
Ukuvota uthumela iSMS ethi UWFM nenombolo yengoma ku-36391.