USAZIWAYO wakuleli, uMinenhle "Minnie" Dlamini uthe ayikho into eyamcika njengezinsolo zokuthi wadayisa ngomzimba ukuze afinyelele kuleli zinga.
UMinnie uphendule kanje emuva kokubuzwa wumsakazi we-947, uThando Thabethe ukuthi kukhona yini okungashiwo ngaye kwiShowmax Roast of Minnie Dlamini, okuwumbhedo.
Uthe okwashiwo kwenye iPodcast ukuthi yena wangena kanjani kule ndima yezokungcebeleka.
"Kuwubuhlaza nje ukusho okuthize ngami ekubeni ungazi lutho njengokuthi ngangena kanjani ebhizinisini lezokungcebeleka.
“Ngicabanga ukuthi okwangiphatha kabi kakhulu ukuthi nanoma iyiphi intombazane, ingacabanga ukuthi ukuze uphumelele kule ndima, kudingeka uvule amathanga," kusho uMinenhle.
Uthe kwamzwisa ubuhlungu obubi kakhulu lokho ngoba uyaziqhenya kakhulu ngokusebenza kwakhe ngokuzikhandla.
"Ngifuna amantombazane nabafana abaseza ngemuva kwami bazi ukuthi akudingeki uze wenze into ezokwehlisa izithunzi ukuze ufinyelele esicongweni," kugcizelela yena.
Yize uMinnie engagagulanga muntu nokuthi loyo muntu wayekhuluma kuyiphi iPodcast kodwa iphephandaba elinguzakwabo weSolezwe Ngempelasonto, i-IOL Entertainment, labika ngoMeyi 16, 2022 ukuthi uMacGyver "MacG" Mukwevho wePodcast and Chill with MacG, uthi wavula imilenze.
UMukwevho wakhwela wadilika kuMinnie emsola ngokuthi wabhabhabala nomnikazi wenkampani kagologo ngoba ayefuna kuvuselelwe isivumelwano ayenaso nayo.
Waze walimisa ngesihloko elokuthi uMinnie noZodwa Wabantu bayafana ngoba bayaqwayiza ukuze bathole imali.
"Badayisa umsu... Umehluko ukuthi omunye akanamahloni ngalokho kanti omunye uyazenyeza ngakho.
“Yilokho okungicika kakhulu ngale ndaba ngoba uma udayisa umsu...vuma ukuthi ngidayisa umsu... ukuze ngithole lamasi... enginawo,“ kusho uMacG.
Ukungcofana ngamazwi phakathi kukaMinnie noMacG kwaqala ngesikhathi uMinnie eshiya angalazi kuMacG nomrepha, uJub Jub kuX ngoDisemba 3, 2021, esola inkulumo yabo kwiPodcast and Chill with MacG njengeyayihlambalaza.
UJub Jub wayekhuluma ngamantombazane ake walala nawo.
"Ngifisa ngabe angiyibukanga. Angiqedanga nokuyibuka. Nina kumele ngabe ninamahloni. Abantu besifazane angeke kwakhulunywa kanje ngabo..."
Inkulumo kaMinnie ayehlanga kahle kuMacG ngoba wamchapha ngezinhlamba futhi waze wathi uMinnie noBoity Thulo abasoze bahlala emishadweni ngoba basuke belandela ibhodwe eliconsayo emadodeni abasuke beshada nawo.
Wathi uhlobo lwamantombazane abayilo, aludingi ukushadwa kodwa elokuthi indoda ilale nalo maqede idlule.
Emuva kwenkulumo kaJub Jub, lo mrepha wabe esevulelwa uxhaxha lwamacala okudlwengula, okuyiwo amgqigqisa enkantolo njengamanje.