KUSHIYA izingqalabutho zamaciko emdlalweni owuchungechunge iGenerations: The legacy. Kubikwa ukuthi phakathi kwabalingisi abazophuma ezinyangeni ezizayo kubalwa uMuzi Mthabela noRonnie Nyakale bashiya.
UMuzi ulingisa indawo kaNkosiyabo Cele, kuthi uRonnie adlale ekaCosmo Diale, emdlalweni oyintandokazi yabaningi iGenerations: the legacy kanti ukhonjiswa kwiSABC1.
Izindaba zokushiya kwabo zidalulwe yiSABC, yathi bobabili bazogcina ukubonakala ngo-Agasti.
UCaroline Phalakatshela, osebenzela iSABC, uthe kuningi ababukeli bomdlalo abazokubona kuwo ngoba kuzogoqwa izindawo zalaba balingisi.
“Sibafisela okuhle kodwa kulo mkhakha wokulingisa oMuzi Mthabela noRonnie Nyakale, njengoba sazi ukuthi behamba lapha kithi ngoba kukhona amathuba amasha abawatholile. Bobabili singasho ukuthi babe yizinsika kulo mdlalo. Sithemba ukuthi amaphupho abo azoqhubeka nokufezeka lapho beya khona futhi bazoqhubeka bazinikele emsebenzini abawenzayo njengoba bebenza kithi,” kuchaza uCaroline.
Uthe ngaphambi kokuthi kuhambe abalingisi bazokwethula umlingisi omusha uDidintle Khunou. UDidintle uzodlala indawo kaTumelo Gcabashe.
UCaroline uthe abangabazi ukuthi intokazi izokhombisa into yamehlo ngoba isike yabonakala emidlalweni yethelevishini neyasesiteji okubalwa iNaledi, Isono neThe Colour Purple Musical.
Uzolingisa indawo yowesifazane osemkhakheni wezemali futhi oxhumene nosomabhizinisi abahlukene abanye abangalungile.
Khonamanjalo, uMthabela ushiya umdlalo nje usekhonjwa kuMzansi Magic(161). Kulesi siteshi uzolingisa emdlalweni iMy Brother’s Keeper ekhonjiswa ngo-7.30 ebusuku phakathi nezinsuku.
Uzolingisa indawo kaMqondisi Shabalala, ongumfowabo omncane kaMshengu nabangasondelene naye kakhulu. Wahamba eside isikhathi engaziwa ukuthi ukuphi.
“Bobabili bake banyathelana obhozo futhi umlando wabo awuqondakali ngoba kukhona lapho besizana khona nalapho beba nezinxushunxushu. Yize uMqondisi enobudlelwane obunje nomfowabo kodwa uyakwazi ukumeseka uma kudingeka namathuba avelayo uyakwazi ukumsiza ukuthi awathole,” kuchaza isitatimende saseMzansi Magic.
UMuzi uzoqala ukubonakala ngoMeyi 10.