KUZOBA khona ukukhala nokugedla kwamazinyo namhlanje kubaculi abaqokelwe kumaSABC Crown Gospel Awards ozoba e-Albert Luthuli Convention Centre, eThekwini namuhla ebusuku.
Kulo nyaka lo mcimbi owasungulwa nguZanele LaMbokazi-Nkambule, uzoba ngokweshumi uba khona, kanti kubhekeke ukuba kube nezimanga ezizojabulisa abaculi nezethameli zomcimbi.
Lokhu kungenxa yokwengezwa komunxa omusha wokuhlonipha umculi nengoma evelele kule minyaka edlule eyishumi.
Kulapho kuzobhekana khona izinkakha eziyibambe ishisa kule mboni, zaphinde zashaya izingoma ezishise izikhotha kulo lonke leli.
Phakathi kwabo kubalwa uThinah Zungu (Kwanqaba Umusa), Solly Mahlangu (Wahamba Nathi) noSfiso Ncwane (Kulungile Baba) abakoweSong of The Decade.
Emunxeni we-Artist of the Decade kukhona uHlengiwe Mhlaba, Sfiso Ncwane, Winnie Mashaba noBenjamin Dube.