UMA kukhulunywa ngomlingisi osematheni kulezi zinsuku, igama likaDeli Malinga yilo elingungqaphambili.
Okwenza uDeli (58) abe ngundabamlonyeni, yindawo kaThenjiwe "MaMzobe" Gumede ayilingisa emdlalweni owuchungechunge osakazwa kuMzansi Magic phakathi nezinsuku ngo-8.30 ebusuku, Umkhokha The Curse.
Ngale ndawo, uDeli uwola imiklomelo ngapha nangapha. Ngenyanga eyedlule uhlabane ngendondo yeBest Actress kumaSimon Mabhunu Sabela Awards abesePlayhouse Opera Theatre, eThekwini.
Ngesonto eledlule uyiphindile indondo yomlingisi wesifazane ovelele kumaRoyalty Soapie Awards.
Kwenzeka lokhu nje, ubevale unyaka owedlule ngendondo yeBest Supporting Actress in a Telenovela kumaSouth African Film and Television Awards (Saftas) nakumaNational Film and Television Awards ngendawo kaMaNgema ayilingisa kwiRedemption ekhonjiswa kwiBET.
Le ntokazi edabuka eMlaza yaqala ukwaziwa kulo mkhakha ngendawo engatheni yomkaKhaphela, uSarah Ngcobo kwiGenerations njengoba seyigila izimanga seyunguMaMzobe.
Uma ubona indlela alingisa ngayo indawo kaMaMzobe, ungaphika ukuthi uDeli akakufundelanga enyuvesi ukulingisa nokuthi ubeqala ngqa ukudlala indawo eqavile kusukela ngo-2021 selokhu angena ekulingiseni okukhokhelwayo ngo-1989.
UDeli ukholelwa ukuthi uthando lomsebenzi owenzayo nokusebenza ngokuzikhandla yikho okumcabele indlela ebheke empumelelweni.
Ubonge kakhulu abantu baseNingizimu Afrika ngothando abamnikeze lona.
Uthe ukube bekungelona uthando lwabo nokweseka umsebenzi wakhe, ngabe akekho umuntu owamnaka.
Uthe uyamangala ukuthi konke lokhu kwenzeka kanjani ekubeni wake wagxekwa kabuhlungu ngomunye uzakwabo wesilisa, wamtshela emehlweni ukuthi ulingisa udoti.
Uthe namanje usamsaba lowo zakwabo angamdalulanga, “angizomusho kodwa uyazazi.” UDeli uthe yena wayengazitsheli ukuthi nanoma wubani angawina emiqhudelwaneni yezindondo ngoba wayezitshela ukuthi kuyagwazwa.
“Ngangizibuza ukuthi mina ngizowina kanjani njengoba ngingenayo imali yokukhokhela intshontsho.”
Uthe ngesikhathi eqokwa okokuqala kumaSaftas nyakenye, wayenganake nakunaka kangangoba akezwanga noma igama lakhe selibizwa njengonqobile.
Uthe okwenze indawo kaMaMzobe ayidlale kanje ukuthi wazitshela ukuthi Umkhokha usewumdlalo oyiziqephu eziwu-13, ufuna ukuyibeka kwelinye izinga ngoba wayeqala ukulingisa eqavile ngalo mlingiswa.
Ngenza isiqiniseko sokuthi ngilibamba ngazo zombili leli thuba, ngasebenza ngokuzikhandla. Kwaba uwafawafa."
UDeli ubuye walingisa koGaz'lam, Rhythm City, The Queen, Isibaya, Adulting nakwiJacob's Cross.
Unxuse ozakwabo abasacathula kule nyathuko emkhakheni wokulingisa ukuba bazibambe ziqine ngisho benikezwe indawo engatheni.