UMDLALI wasesiswini kwiRoyal AM, u-Elias Pelembe, uthe ubona bezokwazi ukuqeda isizini bephakathi kwamaqembu ayisithupha aphezulu kwi-log yeDStv Premiership, inqobo nje, uma bezokwazi ukugcina lo mgqigqo abakuwo njengamanje.
IRoyal AM ebukeka isibuyelwa wumgqigqo wayo ngaphansi komqeqeshi osanda kukhuza ibuya, uJohn Maduka, iphunyukwe yithuba lokubuyela esixhantini samaqembu ayisishiyagalombili aphezulu kwi-log ibambana ngo 1-1 naMaZulu FC emdlalweni womkhaya baseKZN ngeledlule koweligi eMoses Mabhida Stadium, eThekwini.
Ibuyela ensimini ngomunye umdlalo omqoka weDStv Premiership ngokutholana phezulu neSekhukhune United, eChatsworth Stadium, eThekwini, namuhla ngo-5.45 ntambama.
“Umdlalo esiyowudlala neSekhukhune awulula neze, ikakhulukazi njengoba ungacishe uwufanise nowamagqubu ngoba phela sabashaya (ngo 2-1) emzuliswaneni wokuqala, nokusho ukuthi ngeke bavume sibashaye kabili.
Kodwa-ke, thina siwadinga kakhulu amaphuzu kulo mdlalo cishe ukwedlula bona njengoba sidlalela ekhaya phambi kwabalandeli bethu abasesekayo ngaso sonke isikhathi uma sidlalela ekhaya,” kusho uPelembe.
Uqhube wathi: “Indlela esesidlala ngayo manje ikhombisa ukuthi siyiqembu eselibuyelwe wukuzethemba. Futhi uma singakwazi ukugcina lo mgqigqo esikuwona njengamanje kuze kube ngumdlalo wokugcina wesizini, sisebenzise ngendlela amathuba esiwakhayo phambi kwamapali, bese sigwema namaphutha okungenelwa ngamagoli ngemizuzu yokugcina singasonga endaweni yesithupha kwilog.”
IThwihli Thwahla okumanje isendaweni yeshumi kwi-log yePremiership, kule midlalo eyisishiyaglolunye eyisalele kubalwa oweMamelodi Sundowns (ekuhambeni), iMarumo Gallants (ekuhambeni), iStellenbosch FC (ekhaya), i-Orlando Pirates (ekuhambeni), iSwallows FC (ekhaya), ukubalwa embalwa, nokuyimidlalo ebukeka ingelula neze.
Imidlalo yeDStv Premiership:
Namuhla:
Richards Bay v Kaizer Chiefs (King Zwelithini Stadium, 3.30pm); Royal AM v Sekhukhune United (Chatsworth Stadium, 5.45pm); Maritzburg United v Cape Town City (Harry Gwala Stadium, 8pm)
Kusasa:
Chippa United v AmaZulu (Nelson Mandela Bay Stadium, 3.30pm); Marumo Gallants v TS Galaxy (Free State Stadium, 3.30pm); Stellenbosch v Sundowns (Danie Craven, 3.30pm); Supersport v Arrows (Lucas Moripe Stadium, 5.45pm)