ABADLALI basesiswini beKaizer Chiefs, uNkosingiphile Ngcobo noThabo Cele, bayavumelana ngesimo esinzima esibhekene neqembu labo elehlulekayo ukulawula imidlalo nokugcina umgqigqo owodwa.
IChiefs ebuya esibhaxwini semidlalo emibili ilandelana ngokushaywa yiRichards Bay FC neLamontville Golden Arrows, inenselelo yokuvuka izithathe njengoba izotholana phezulu neTS Galaxy koweBetway Premiership, ePeter Mokaba Stadium, ePolokwane, namuhla ngo-7 ebusuku.
Ukwehluleka ukugcina umgqigqo yisona sifo esihlasele iChiefs kule sizini ngaphansi komqeqeshi, uNasreddine Nabi, oseshweleze kwaze kwavama umusa kubalandeli baleli qembu, enxusa ukuba babekezele, nokho osekucaca ukuthi isiqala ukubama emphinjeni eyokushaya udaka kwaleli qembu.
“Sonke sikhathazekile. Kusukela ekuqaleni kwesizini besilokhu sihluleka ukulawula imidlalo ngisho kuyithina esingaphezulu ngomdlalo kuneqembu esibhekene nalo.
"Sihluleka ukugcina umgqigqo nesivinini somdlalo, ngaleyo ndlela sizithole sesidlala ngokuxhamazela sigcine sesihlulwa,” kusho uNgcobo waKwaMafunze, eMgungundlovu.
UCele ojoyine iChiefs ngoJanuwari, ukubeka ngokucacile ukuthi isimo abakuso manje bazifake bona kuso.
“Yithi esizidlisayo, akuwona amaqembu asibhekene nawo asinika inkinga, inkinga ikithina. Sinomkhuba wokulahla ibhola kalula, okuyinto ekhathazayo leyo,” kusho uCele ngokungahlonizi.
“Ukuthi iChiefs ibe kule ndawo ekuyona manje akumnandi, inhlekelele. Ungakubiza ngenhlekelele, ngoba siyazi ukuthi singenza kangcono kakhulu kunalokhu.
Umqeqeshi (uNabi) uhlezi esitshela ngaso sonke isikhathi ukuthi asilawule umdlalo, ukuze sizokwazi ukwakha amathuba amaningi okushaya amagoli, singatatazeli nasemuva ukuze siwine imidlalo.
Uma wehluleka ukulawula umdlalo uzithola sewenza amaphutha angenasidingo. Kuzomele senze kangcono ngasohlangothini lokulawula umdlalo ukuze sikwazi ukuhleleka kahle uma kwenzeka silahla ibhola.”
Lo mdlali wasesiswini odabuka KwaMashu, eThekwini, ophume eseqhutshwa emdlalweni waMakhosi ne-Arrows ngeledlule eMoses Mabhida Stadium eThekwini, uvumile ukuthi akukubi kakhulu ukulimala kwakhe kodwa kuzocaca ngaphambi komdlalo ukuthi uzokwazi yini ukudlala kowanamuhla.
Amakhosi asemshikashikeni wokulwela ukugcina indawo kwi-Top 8, azobhekana neThe Rockets esefomini enhle kule sizini, nephakathi kwamaqembu alwela ukuzibekisela indawo endaweni yesithathu kwi-log yePremiership ngenhloso yokudlala kwiCaf Confederation Cup ngesizini ezayo.