SIBHEKIWE isinqumo esizothathwa ngumqeqeshi weBafana Bafana, uHugo Broos, ngabadlali ababili abadingisiwe kuleli qembu ngokwahlukana kwezizathu uma esememezela isikwati esizodlala neLesotho kowokuhlungela iNdebe yoMhlaba ka-2026, ezoba e-USA, Mexico, naseCanada.
IBafana, evale unyaka odlule ngokuzibekisela indawo kwi-Africa Cup of Nations (Afcon) ezoba eMorocco, ngoDisemba nonyaka, izobuyela kweyokuhlungela eyoMhlaba lapho ilele endaweni yesibili ku-Group C.
IRwanda, Bafana, neBenin babambene ngamaphuzu ayisikhombisa esicongweni seqoqo ngemuva kwemidlalo emine. ILesotho, Nigeria neZimbabwe nabo bayingxenye yaleli qoqo ngamaphuzu amahlanu, amathathu, namabili ngokwahlukana.
NgoMashi 21, iBafana izokwamukela iLesotho kuleli qoqo ePeter Mokaba Stadium, ePolokwane.
Umdlali omusha weMamelodi Sundowns, uJaydon Adams, ngomunye wabadlali abadingiswe nguBroos kwiBafana, benoCassuis Mailula odlalela iWydad Casablanca yaseMorocco.
U-Adams owayesemabhukwini eStellenbosch FC umiswe isigubhukane nyakenye kwiBafana, kulandela isenzo sakhe uBroos ayesichaze njengesixhumene nokuziphatha.
Nakuba uBroos esho kanje, wayevele engakufihlanga ukuthi umnyango usewuvalile kulo mdlali ayehambe naye kwi-Afcon yase-Ivory Coast, osekuwumlando ukuthi iBafana yabuya kuyona nendondo yethusi.
NakuMailula isimo siyafana nakuba esefomini emangalisayo kulezi zinsuku kwiligi enkulu yaseMoroco. Ngesikhathi uMailula eseqala ukuthola indawo enhliziyweni kaBroos ngo-2023, wasayina kwiToronto FC yaseCanada, edlala kwiMLS.
Ngaleso sikhathi uBroos wakubeka kwacaca ukuthi ngeke esambiza lo mdlali kuleli qembu lesizwe futhi ijezi selizomeqa ekhona.
Kwaba sengathi uyabhula uBroos ngoba uMailula ubelizwa ngendaba ijezi kwiToronto, kwaze kwaba uthola ithuba lokubolekiswa kulezi zinkunzi zaseMorocco, eziqeqeshwa uRhulani Mokwena, odabuka eMzansi.
Ngeke kwethuse kangako uma umqeqeshi ejika kwayekushilo ngo-Adams noMailula njengoba enza nakuThemba Zwane yize waqala ngokumchizela kepha wagcina ebonile ukuthi iqophelo leBafana likhula ngendlela angachazeki uma ekhona enkundleni.
“Wonke umqeqeshi okhaliphile uyawujika umqondo uma esebone ngenye indlela,” kwasho uBroos ngesikhathi amukela ukuthi iBafana ingcono uma kukhona uZwane enkundleni.