OWAYENGUMSAKAZI woKhozi FM uNgizwe Mchunu ubengomunye webebehola phambili amabutho ebeviliyela kwaNongoma kuyolandwa umzimba weSilo samaBandla enkabeni yedolobha KwaNongoma.
Kuzokhumbuleka ukuthi uNgizwe, obengasifakile isifonyo namhlanje, izolo uphumele obala waqopha ivideo ethembisa ukuthi noma ikanjani bazohloba balibhekise kwaNongoma ukuyohlonipha iSilo ekulindeleke ukuthi sitshalwe phakathi kwamabili namhlanje.
Amavideo aseqalile ukusabalala ezinkundleni zokuxhumana lapho kubonakala amabutho nezintombi zivunule ziconsa wena owabona usulu loMkhosi woMhlanga. UNgizwe useqalile naye ukusabalalisa ezinye zezinto ezenzeka kule ndawo. Abantu abaningi kubachazile ukutheleka kwamabutho nezintombi namhlanje.
Inkaba yedolobha beyigcwele abantu nabebezobukela lomviliyelo. Izintombi nazo zilokhu zibhikla ingoma nokungenye yezinto ezivamise ukugaba ngayo uma zihlangene. Kulindeleke ukuthi elokhu engena elandelana amanye amavideo afuze lawa njengoba zisaqhubeka izinhlelo zanamhlanje zokuvalelisa iMbube.