IZIHLABANI zomculo wokholo, iMTN Joyous Celebration, zizobusisa abalandeli bazo ngolozolo lomculo kwiJoyous Easter MegaFest eNkosi Albert Luthuli ICC, eThekwini ngempelasonto yePhasika.
Lolu chungechunge lwamakhonsathi eMTN Joyous Celebration luzoqala ngoLwesihlanu lwangomhla ka-7 Ephreli luze luphothulwe ngeSonto lango-Ephreli 9. Omunye wabasunguli balezi zintandokazi zomculo wokholo, uLindelani Mkhize, uthe bese kufike isikhathi.
"Zonke izindlela zibheke eThekwini ngaleli Phasika. Indawo lapho konke kwaqala khona." Uthembise ukushiya izithameli zamakhonsathi abo zibheme zakholwa ngonqambothi lomculo abazobe beluqhulula.
"Sonke sibheke izinto ezintsha. Lo mcimbi uyisiqalo sezinto ezintsha kithi siyiqembu. Yonke le minyaka abalandeli bethu nabathandi bomculo bebehlanganisa izimpelasonto zangePhasika neJoyous eGoli.
Ukwesekwa bekuyisimangaliso futhi siyazi abanye bazodumala ngoguquko." Nakuba kunjalo uqinisekise abalandeli babo ukuthi lesi yisiqalo sento entsha ezobajabulisa. NgoSuku lwePhasika iJoyous Celebration izokwethula umsebenzi yayo ka-27 eyawuqopha e-Emperors Palace neHope& Victory.
Abaxhasi baleli qembu iMTN, bathe ukubambisana kwabo naleli qembu kuyisimangaliso.
ULindelani uthe ngosuku lwesibili izihambeli zizokwazi ukuzitika komculo wokholo othakwe nesigqi se-soul ne-jazz kwiGospel Meets Soul& Jazz Supper Club, lapho izitatanyiswa zizokwehlisa umculo ngokudla neziphuzo ezehla esiphundu. Uthe ngosuku lwangeSonto iJoyous Celebration izobe icula ngokuhlanganyela nezinye izihlabani zomculo kwiJoyous&Friends.
Oyisikhulu sale nkampani emkhakheni wezokuxhumana, uNomsa Chapeli, uthe sebewabheke ngamehlo abomvu amakhonsathi eMTN Joyous Celebration lapho izobe ijabulisa khona yonke inhlobo yomuntu, omdala nomncane.
Amathikithi okuthamela umcimbi aseyatholakala eWebtickets nasePick 'n Pay ngoR250. Amatafula eGospel Meets Soul& Jazz aseyatholakala ngokubhalela [email protected] noma kwiWhatsApp 076 115 5943.