EMUVA kwesikhathi eside kuqagelwa ngokuthi kukhona osekwenzeka phakathi kwabaculi baphesheya kwezilwandle kuphenduleke iningi ohlelweni lwethelevishini. UMrepha waphesheya kwezilwandle owaziwa ngelikaCommon uvale abaningi umlomo ohlelwni lwethelevishini iThe Jennifer Hudson Show eqinisekisa amahlebezi okuthi uvuke ngentombi entsha. UCommon ebuzwa uJennifer ukuthi ngabe uqonyiwe yini uphendule ngaphandle kokungabaza nokuzama ukufihla ukuthi ukhona owesifazane athandana naye.
Akagcinanga nje lapho ube esemchaza nokuthi uwuhlobo olunjani sakuchoma nokuvele kwacalela ababukeli ukuthi ukhuluma ngoJennifer ebese kuvele kunezinsolo zokuthi ujola naye. " Ngithandana nomunye wabantu abahle ngendlela emangalisayo nesengake ngahlangana naye empilweni. Ukhaliphile, uthanda uNkulunkulu ungowesifazane ozithobile futhi unekhono," kusho uCommon.
Ngaleso sikhathi uJennifer ubeshalaza ubala nokungezinye zezinto uCommon okubukeka sengathi ziyamchaza kuye ngokuba nentobeko. Usho kanje nje uCommon kulolu hlelo vele bese kunevidiyo esabalele ezinkundleni zokuxhumana beyobuka eminye yemidlalo ye-basketball. Selokhu kudlale lesi siqephu kuyachwaza ezinkundleni zokuxhumana abantu okubalwa nabaseNingizimu Afrika.
" Ubezama ngayo yonke indlela ukungashaywa amahloni, ngiyabajabulela yinhle kakhulu le nto," kusho uMrsaustinloading_.
" Bekuyindlela elula lena yokumemezela," kusho u-Andyv27.
