KULO nyaka akwaziwa mbhantshi kujiya, ukuthi iyiphi ingoma engase inqamule unyaka oKhozini. Ingoma ezithe uma zisuka amadaka yazihola phambili ngeyomculi kamaskandi waseMzimkhulu, uSkweletu ethi: Inja Endlini.
Ezithendeni zayo bekuhleli omunye umculi kamaskandi waseMidlovo, Ithwasa Lekhansela ngengoma ethi: Awungodli.
Nakuba amabhinca efuna lo mklomelo uthathwe ngoyedwa phakathi kukaSkweletu neThwasa kodwa ukushona kukaMampintsha weBig NUZ sekwenze iningi lafuna umufi avaleliswe ngalo mklomelo. Ngisho namabhinca asehlukene phakathi njengoba sekukhona aselibeka ngembaba elokuthi lesi sicoco sifanele iBig NUZ engene ngengoma ethi: Ngeke Ngivume.
Yize kunjalo uyingozi umculi wokholo, uBetusile ngengoma ethi: Ngena Noah, ngenxa yokuthi abantu base-Eastern Cape bayesekana. Ngezikhathi zowayengumsakazi woMhlobo Wenene FM, uSaba Mbixane kumaSatma Awards babesekana.
UBetusile uma ehlabana uzobe engaqali ukudla umhlanganiso njengoba eke wahlabana ngalo mklomelo kumaSABC Crown Gospel Awards.
Wakhala wemuka nendondo yeBest Song of the Year. Nakulo nyaka angabaphuca iqatha emlonyeni abaculi asebebhekiwe. Uma iphinda iphumelela iBig NUZ, kuzobe sekuyihlandla lesithathu njengoba yake yawuhlukanisa ngengoma ethi: Umlilo nangethi: Serious. Beyisabambene ngamabili ngapha, namabili ngale neMalaika njengoba nayo seyike yawuthola umklomelo amahlandla amabili elandelana ngengoma ethi: Destiny nethi: 2bhobho.
Abanye abaqokiwe kwiTop 10 yakulo nyaka nguDJ Maphorisa- Ba Strata, K.O- Sete, Skye Wanda- Amazwi, Malungelo- Ngidlisiwe, Big Zulu - Voicemail noDJ Tira -Sikilidi. UTira usazikhipha emjahweni njengoba anxusa abantu ukuba bathathe amavoti ebebehlela ukumnikeza wona kodwa bawafake ngobuningi kwiBig NUZ.
Selokhu kwaqala ukuhlukaniswa konyaka oKhozini, naba abaculi asebeke bawaqwaqwada amakhanda kozakwabo:
1998-Brenda Fassie - Vulindlela
1999-Dj Walker- Chesa Mpama
2000-Mandoza- Nkalakatha
2001-Zola- Mdlwembe
2002-Mafikizolo- Bhuti Ngihamba Nawe
2003-Mzekezeke- Akekho Ugogo
2004-Malaika- Destiny
2005-Malaika- 2Bhobho
2006-DJ Sbu- Remember when it rains
2007-DJ Cleo- Sisi ngihamba nawe
2008-DJ Cleo - Hands up
2009-Big Nuz- Umlilo
2010-Professor- Jezebel
2011-Big Nuz- Serious
2012-DJ Tira ft Big NUZ and Joocy- Summer time
2013-Uhuru- Ytjukutja
2014-DJ Merlon ft Mondli Ngcobo- Koze Kuse
2015-Kings of the weekend- KOTW Anthem (Ngicishe Ngafa)
2016-Mroza- Van Damme
2017-Distruction Boyz- Omunye
2018-Prince Kaybee ft Busiswa- Banomoya
2019-Ntencane- Wawuthembeni
2020-Khuzani- Ijele
2021- DJ Hlo - Isbani