Kaizer Chiefs (2)4
Free Agents (0)0
IKAIZER Chiefs iqinise idolo abalandeli bayo ngaphambi komdlalo wabakhaya baseSoweto ne-Orlando Pirates ngokuxebula iFree Agents emdlalweni weNedbank Cup Last 32 eFNB Stadium, eNasrec, izolo ebusuku.
Amagoli eChiefs ashaywe nguPule Mmodi amabili, Inacio Miguel noRanga Chivaviro ngokwehlukana kweziwombe.
Ngokuwina kwi-Agents edlala kwi-ABC Motsepe League waseGauteng, iChiefs ijoyine amanye amaqembu asedlulele kwi-Last 16 yeNedbank. Ngaphandle kokuthi lokhu kubeka Amakhosi ethubeni lokuqukula indebe emuva kwesomiso seminyaka, akubuzwa ukuthi kunike isibindi abalandeli abanetwetwe ngaphambi kokubhekana nePirates emdlalweni weBetway Premiership eFNB Stadium ngoMgqibelo ntambama. IPirates, evuthayo kulezi zinsuku, idlulele kwi-Last 16 emuva kokuxebula iRichards Bay FC eThekwini. Ukuwina kwala maqembu kwenyusa isasasa lomdlalo wabakhaya amathikithi awo asedayise aphela.
Kowe-Agents, Amakhosi idlalise oyedwa kubadlali abebesengozini yokungadlali ngempelasonto ngenxa yamakhadi aphuzi amathathu aphuzi okunguYusuf Maart. IChiefs izobhekana nePirates esebuyile umqeqeshi, uNasreddine Nabi, osesiqedile isigwebo sekhadi elibomvu.
Enkundleni, iChiefs iyihlasele zibekwa iFree Agents, kucaca ukuthi ifuna ukushaya igoli ngokushesha kulo mdlalo. Akubuzwa ukuthi lokhu kwehlise uvalo kubalandeli bayo kwazise inomlando wokukhishwa kwiNedbank Cup ngamaqembu adlala ezigabeni eziphansi. Kuyithathe imizuzu-18 iChiefs ukugqobhoza udonga lwe-Agents ebikhombisa ukungesabi. UMmodi uqobele phakathi ibhola elide likanozinti uBruce Bvuma. Leli goli lenyuse ukuzethemba kubadlali beChiefs abahlasele bephindelela. Ngomzuzu ka-26, uMmodi ushayele Amakhosi igoli lesibili.
Esiwombeni sesibili, i-Agents ibuye isinomfutho, isiyihlasela iChiefs. Nakho ibihluleka ukugqobhoza udonga lwaMakhosi. Kushabalale konke ngomzuzu ka-62 ngesikhathi uMiguel engqofela phakathi igoli lesithathu leChiefs. Emuva kwaleli goli, umgadli we-Agents, uSaheed Adebayo, uthole ikhadi elibomvu ekade ekhononda kunompempe. Sekusele imizuzu eyisikhombisa kuphele umdlalo, uChivaviro uqobele phakathi elesine.
Imiphumela yemidlalo yemidlalo yeNedbank Cup
Pretoria Callies 0-1 Marumo Gallants; Golden Arrows 1-2 Chippa United; Venda 1-3 Cape Town City; Umvoti 0-3 Baroka; Lerumo Lions 0-2 Durban City; Mamelodi Sundowns 5-2 Sibanye Golden Stars; Mpheni Home Defenders 3-1 Hungry Lions; Richards Bay 1-3 Orlando Pirates; Kaizer Chiefs 4-0 Free Agents