IMSHAYISE ngovalo indawo kaNkosazana ayilingisa emdlalweni iMy Brothers Keeper, uZola Mhlongo muva nje, obonakala emidlalweni ehlukene kuMzansi Magic.
UZola akagcini ngokuba kulo mdlalo kuphela kodwa ulingisa nasemdlalweni iHow to Manifest a Man osanda kubuya isizini yesibili khona kuMzansi Magic.
Ekhuluma neSolezwe, uZola uthe ukuhamba KwaZulu-Natal nokula aqala khona uhambo lwakhe ngokuba semsakazweni yikhona okumvulele amathuba.
“Ngaqeda enyuvesi ngangena emsakazweni. Ngangifundela ukuba umlingisi vele ngenxa yokuthi esikoleni ngase ngikuthanda ukulingisa. Ukuba umsakazi weGagasi kula izinto zami zaqala ukuvuleka khona kodwa ngase ngikhetha ukuthi ngiye eGoli ngemuva kokuthola ithuba lokwethula uhlelo iShay’ iround kwiSABC1. Ngemuva kwalokho, ngahamba izinhlolokhono ezihlukene ngase ngiphinda ngithola ithuba emdlalweni iHow to Manifest a Man,” kuchaza uZola.
Uthe uyithandile indawo ayilingise kulo mdlalo kodwa okubi ngayo ukuthi ibiveza owesifazane obheke ukusizwa abantu besilisa yena engazenzeli lutho oluzomenza abe nekusasa eliqhakazile.
"Uma singabantu sidinga ukuthi sisebenze kanzima bese sizakhela ikusasa. Kodwa kulo mdlalo bengingowesifazane nje obheke ukwenzelwa abesilisa konke. Yilokhu engikuthandile ngendawo engiyilingisa kuMy Brothers Keeper, uNkosazana ngowesifazane osebenza kanzima, omuhle, owusizo kwabanye abantu, mina naye sicishe sifane. Ungowesifazane ongenawo umndeni kungakho ekhethe ukuthi angene esithenjini ngoba efuna ukuthi uma ebuya emsebenzini kube khona umyeni amlindele,“ kusho yena.
Uthe angakuthandi ngoNkosazana ukuthi uzifake esithenjini nokuyinto yena angaziboni engena kuyo.
Uveze ukuthi yena uthanda ukuba yedwa kumuntu wesilisa athandana naye, uthando lwabo kube ngolwabo bobabili.
UZola uphinde waveza ukuthi kufezeke amaphupho akhe nokujoyina umsakazo iMetro FM, la enza khona uhlelo lwasekuseni ngempelasonto oluthi Weekend Breakfast Sounds Good.’
Lolu hlelo ulwenza ngokubambisana noSomizi Mhlongo, Keorapetse Hlope, Kutlwano Taukobong noDJ JAWZ.
Maduzane, uZola uthe uzobonakala ethula uhlelo oluthi Show Me You Are Funny kwesinye seziteshi zethelevishini.