IKAPAKELE eMnyangweni weMfundo ePhakeme eyokuhoxiswa koxhaso lukahulumeni waseMelika, obelusiza kuleli. Lolu xhaso olufaka izinsiza zezempilo zokulwa neHIV, lwahoxiswa nguMengameli wakuleliya lizwe, uMnuz Donald Trump.
Lokhu kwenze uNgqongqoshe eHhovisi likaMengameli, uNksz Khumbudzo Ntshavheni, nozakwabo kwezemfundo ephakeme uDkt Nobuhle Nkabane, bahlangana nabaphathi bamanyuvesi ngaphansi kwenhlangano yabo i-Universities South Africa (USAF).
Isitatimende esikhishwe ngemuva kwalo mhlangano, siveze ukuthi indaba yokuhoxiswa kwalolu xhaso inomthelela nakwezemfundo. Sithe amanyuvesi athinteka ngasohlangothini oluthinta ucwaningo. Kuzokhumbuleka ukuthi amanyuvesi aba matasa nocwaningo okuze kushintshane nabanye osolwazi abasuka kwamanye amanyuvesi, bezothekela ulwazi kwamanye.
"Indaba yentela efakwa wuhulumeni waseMelika uma kuhanjiswa izimpahla kuleliya lizwe, nayo inomthelela. Kubhungwe nangendaba yesabelomali nemali ezotholwa yilo mkhakha kulo nyaka wezimali."
Sithe indaba yesabelomali ichazwe yiPhini likaNgqongqoshe wezeziMali, uDkt David Masondo.
Kuphinde kwabhungwa ngokuthi abamanyuvesi kumele bakhe ubudlelwano nozakwabo bakwamanye amazwe.
Abamanyuvesi bahlale bekhala ngezinkinga ezibhekene nesikhwama esixhasa ngemali yokufunda, iNational Students' Financial Aid Scheme.
Indaba yalesi sikhwama ihlale idala imibhikisho ehambisana nokushiswa kwempahla kwezinye izikhungo.
UDkt Nkabane uhambele eWalter Sisulu University, eMthatha, lapho kushone khona isitshudeni ngesikhathi kunombhikisho.
Izitshudeni bezikhala ngesimo esingesihle sezindawo zokuhlala.
Ngendlela isimo esibi ngayo kushiswe izimoto, kanti umsolwa kuthiwa ngesinye sezisebenzi zakule nyuvesi ezihlaselwe yizitshudeni ngesikhathi sombhikisho. Kuthiwa uhoshe isibhamu wadubula ebhekise kwizitshudeni ebezibhikisha ngoLwesibili.
UDkt Nkabane uthe uzozizwela izinkinga kule nyuvesi, wadlulisa namazwi enduduzo emndenini wesitshudeni esishonile.
Kuke kwaba nokudideka ukuthi oshonile uyisitshudeni noma akasona isitshudeni. Kodwa uDkt Nkabane ukuqinisekisile ukuthi uyisitshudeni.