UZIMISELE ukumela idolobha uMgungundlovu uNksz Nonkululeko Sithole, waseMbali, ongomunye wabangu-10 abangenele umncintiswano wonobuhle u-Miss SA Plus World 2020 /21.
UNksz Sithole ozalelwe eMbali kodwa osezinze eGoli ngenxa yomsebenzi ungomunye wabesifazane abangu-10 abangahle bethwese isicoco ngo-Okthoba 2 nonyaka e-Bloemfontein Civic Centre.
“ Ngiyaziqhenya kakhulu ngokuba ngomunye wabangu-10 abangadla umhlanganiso. Ngiyafisa ukubuyela nesicoco ekhaya eMgungundlovu. Okukhulu nje engifisa ukukuzuza ukuba nomkhakhaso wokulwa nokuhlukunyezwa kwabesifazane nezingane. Ngingafisa ukuba izingane zivikeleke kukho konke ukuhlukumezeka kwezingane. Ngifisa ukunqoba,” kusho uNonkululeko.
UNonkululeko oke wavela kwi-Generations, ufunde e-Ashdown Primary, nase-Russell Girls High . Okwamanje useGoli lapho esebenza khona njenge-Occupational Health Nurse Practitioner Specialist.
Wenze iziqu zakhe e-University of Johannesburg.
Ngaphandle kokungenela lo mqhudelwano usebenza kwithelevishini nasemidlalweni yeshashalazi. Uke wavela kwi-iSipho, Ring of lies, Gomora, Side Dish, Isintshi, nakwezinye izikhangiso.
