BATHEMBISA ubumnandi kuphela abahleli bomcimbi weSolezwe, Intandokazi Women's Club, ezoba ngo-Agasti 27 ePremier Hotel, eMhlanga.
Kuningi okuzobe kwenzeka emcimbini wabesifazane, ozoqala ngo-10 ekuseni, njengoba uzobe ugxile ezinkulumweni ezithuthukisa abesifazane kwezomnotho.
UNksz Phumi Mkhize, wezokumaketha kwiSolezwe uthe abantu mabaphuthume bathenge amathikithi ukuze bangaphuthelwa yingqophamlando yomcimbi.
“Abantu mabaphume ngobuningi babo bazohlanganyela nenye imbokodo kudingidwa izihloko ezibalulekile, kuyinyanga yabo. Amathikithi anesibalo esithile, yingakho sinxusa ukuthi basheshe bawathenge ukuze bangaphoxeki ngomzuzu wokugcina,” kusho uNksz Mkhize.
Amathikithi anguR450, azoqala ngoMsombuluko ukutholakala.
UZimiphi “Zimdollar” Biyela, ongumsakazi woKhozi FM uzobe ephethe uhlelo, umculi wokholo uDumi Mkokstad uzonandisa ngamanoni akhe athandwayo.
UNksz Mkhize utshele imbokodo ezohambela umcimbi ukuthi igqoke imibala yeSolezwe, kwazise ukuthi umcimbi uzobe uhlangene nemigubho yaleli phephandaba yokuqeda iminyaka engu-20 lasungulwa.
“Izihambeli zethu zingagqoka noma yini enemibala omnyama, omhlophe noluhlaza okuyimibala yephephandaba labo eliyintandokazi,” usho kanje.
Intandokazi Women's Club ingumbuthano wabesifazane owasungulwa yiphephandaba lakho Isolezwe, ngawo unyaka elasungulwa ngawo.
Inhloso yawo ngukuthuthukisa, ukwazisa, ukufundisa nokujabulisa abesifazane.