IZOVULWA ngendumezulu yomcimbi ozoba ngoJuni 16 indawo yokudlala izimoto, iDurban Spin City eseMega City, eMlaza, eThekwini.
UKiller Gumede ongomunye wabasunguli, uthe bakhe le ndawo yokushaya izidudla ngoba befuna ukuthuthukisa umdlalo wabo.
“Ngeke igcine ngokusebenza ngoJuni 16 kuphela kodwa njalo ngezimpelasonto kuzoba khona into ekhona,” kusho uKiller.
“Sifuna umdlalo uthuthuke, kungabi ngathi yinto yoskhotheni nezingane zingene. Ezabelungu zidlala zisencane ngoba bayakuqonda ukuthi wumdlalo.”
Uqhube wathi ukuba khona kwale ndawo kuzonciphisa ukudlalwa kwezimoto emigwaqweni yomphakathi ngoba izobe ivuleleke kuwona wonke umuntu.
“Ungafika ngemoto yakho uzodlala lapha kodwa kube khona okukhokhayo ngoba indawo kumele inakekelwe,” kuchaza uKiller.
Uthe ngoJuni 16 kuzobe kunabashayeli abangaphezu kuka-20 abazobe beshaya izidudla. Ukungena wuR100 esangweni, R50 izingane kuthi i-coolerbox ibe nguR100.
“Sizoqala ngo-10 ekuseni, kuze kube wu-12 ebusuku. Abantu bangeza nemindeni yabo, bazojabula nathi.”